पंतप्रधान नरेंद्र मोदी यांचा आज दि. २४ सप्टेंबरपासून अमेरिका दौरा सुरू होणार आहे. आज दि. २४ रोजी पंतप्रधान मोदी व अमेरिकेचे अध्यक्ष जो बायडेन यांच्यात वॉशिंग्टनमध्ये प्रथमच द्विपक्षीय बैठक होणार आहे. त्यात व्यापार, गुंतवणूक, संरक्षण व सुरक्षा या मुद्द्यांवर चर्चा होण्याची शक्यता आहे. मोदी-बायडेन भेटीत मूलतत्त्ववाद तसेच दहशतवादाचा मुकाबला यासह प्रादेशिक प्रश्नांवर चर्चा होणार आहे.
अफगाणिस्तानातील घडामोडीही या बैठकीत चर्चेचा विषय ठरतील. अमेरिकी कंपन्यांच्या मुख्य कार्यकारी अधिकार्‍यांशीही मोदी यांची चर्चा होणार आहे. पंतप्रधान मोदी हे त्यांच्या बहुप्रतिक्षित अमेरिका दौर्‍यावर काल बुधवारी रवाना झाले आहेत. या दौर्‍यात ते अमेरिकेचे अध्यक्ष जो बायडेन यांच्याशी व्यापक वैश्विक धोरणात्मक भागीदारी आणि परस्पर हितसंबंधांच्या प्रादेशिक आणि जागतिक समस्यांवर चर्चा करणार आहेत. याआधी त्यांनी ऑस्ट्रेलिया, जपान आणि अमेरिकेच्या प्रमुखांसोबत भेट घेऊन त्यांच्यासोबत संबंध आणखी मजबूत करण्यावर भर देणार असल्याचे म्हटले आहे.
पंतप्रधान मोदी हे काल बुधवारी अमेरिकेला रवाना झाले असून ते रविवारी परतणार आहेत. मी अमेरिकेचे अध्यक्ष बायडेन, ऑस्ट्रेलियन पंतप्रधान स्कॉट मॉरिसन आणि जपानचे पंतप्रधान योशीहिडे सुगा यांच्यासह वैयक्तिकरित्या क्वॉड लीडर समिटमध्ये सहभागी होईन. जपान, ऑस्ट्रेलिया व अमेरिका या देशांशी मजबूत द्विपक्षीय संबंधांचा आढावा घेईन आणि प्रादेशिक आणि जागतिक समस्यांवर आमचे आदान -प्रदान चालू ठेवू, असेही मोदींनी म्हटले आहे.
