50 राज्यांत 3300 ठिकाणी नागरिकांचे आंदोलन

अमेरिकेत राष्ट्राध्यक्ष ट्रम्प यांच्या विरोधात झालेल्या ‘नो किंग्स रॅली’मध्ये 80 लाख लोकांनी भाग घेतला. संपूर्ण अमेरिकेतील सर्व 50 राज्यांमध्ये 3,300 पेक्षा जास्त ठिकाणी हे आंदोलन करण्यात आले होते. ऑक्टोबरमध्ये झालेल्या मागील नो किंग्स आंदोलनाच्या तुलनेत यावेळी सुमारे 10 लाख अधिक लोक सहभागी झाले आणि जवळपास 600 हून अधिक कार्यक्रम आयोजित करण्यात आले.

आंदोलक ट्रम्प सरकारच्या अनेक धोरणांवर नाराज आहेत. विशेषतः इराणसोबत वाढलेला तणाव, कठोर इमिग्रेशन कारवाई आणि वाढत्या महागाईविरोधात आंदोलक रस्त्यावर उतरले आहेत. अनेक ठिकाणी लोकांनी ट्रम्प आणि उपराष्ट्रपती जेडी वेंस यांच्या विरोधात पोस्टर्स दाखवले आणि त्यांना पदावरून हटवण्याची मागणी केली.
न्यूयॉर्कच्या टाइम्स स्क्वेअर आणि मॅनहॅटन परिसरातही मोठ्या संख्येने लोक जमले होते. गर्दी इतकी जास्त होती की पोलिसांना अनेक रस्ते बंद करावे लागले. अनेक आंदोलकांनी ट्रम्पच्या छायाचित्रासोबत एपस्टीन लिहिलेले पोस्टर फडकावले. शिकागोमध्येही हजारो लोक रस्त्यावर उतरले आणि ‘ट्रम्प हटाओ’ सारख्या घोषणा दिल्या. अमेरिकेतील ओरेगन राज्यातील पोर्टलँड येथे निदर्शनांनंतर वातावरण तणावपूर्ण झाले. निदर्शकांनी अमेरिकन इमिग्रेशन एजन्सीच्या कार्यालयाबाहेर अमेरिकेचा झेंडा जाळला.

मात्र बहुतेक ठिकाणी निदर्शने शांततापूर्ण होती, परंतु लॉस एंजेलिसमध्ये काही ठिकाणी परिस्थिती बिघडली. तेथे काही निदर्शक आणि पोलिसांमध्ये संघर्ष झाला, ज्यात अनेकांना अटक करण्यात आली.

आंदोलनामुळे लोकांना
फरक पडत नाही
व्हाईट हाऊसने या आंदोलनांना ‘थेरपी सेशन’ असे संबोधत सामान्य लोकांना याचा फारसा फरक पडत नाही. फक्त अमेरिकेतच नाही, तर जगाच्या इतर भागांमध्येही ट्रम्प यांच्याविरोधात नाराजी दिसून आली आहे. पॅरिस, लंडन आणि लिस्बनसारख्या शहरांमध्येही लोकांनी रस्त्यावर उतरून ट्रम्प यांच्याविरोधात निदर्शने केली आणि त्यांना पदावरून हटवण्याची मागणी केली.