इंग्लंडचा सलामीवीर जेसन रॉय याने इंडियन प्रीमियर लीगमधून माघार घेतली आहे. दिल्ली कॅपिटल्सने १.५ कोटी रुपये मोजून रॉयला आपल्या संघात सामावून घेतले होते. दुखापतीच्या कारणास्तव त्याने या आठवड्यातील पाकिस्तानविरुद्धच्या टी-ट्वेंटी मालिकेतूनही अंग काढून घेतले आहे. इंग्लंड अँड वेल्स क्रिकेट मंडळाने याची माहिती दिली आहे.
कॅपिटल्सने रॉय याच्या जागी दुसरा फलंदाज न निवडता ऑस्ट्रेलियाचा नवोदित डावखुरा जलदगती गोलंदाज डॅनियल सॅम्स याला संघात स्थान दिले आहे. आयपीएलमधून अंग काढून घेणारा रॉय हा इंग्लंडचा दुसरा खेळाडू आहे. यापूर्वी अष्टपैलू ख्रिस वोक्स याने न खेळण्याचा निर्णय जाहीर केल्यामुळे कॅपिटल्सला दक्षिण आफ्रिकेच्या ऍन्रिक नॉर्के याला घ्यावे लागले होते. आयपीएलमध्ये खेळण्याची सॅम्स याची ही पहिलीच वेळ असेल.
२०१९-२०च्या बिग बॅश मोसमात सिडनी थंडर्सकडून खेळताना त्याने स्पर्धेत सर्वाधिक ३० बळी घेतले होते. याच कामगिरीमुळे त्याला ऑस्ट्रेलियाच्या आगामी इंग्लंड दौर्‍यासाठी निवडण्यात आले आहे. ४ ते १६ सप्टेंबरपर्यंत चालणार्‍या या दौर्‍यात प्रत्येकी ३ वनडे व ३ टी-ट्वेंटी सामने खेळविण्यात येणार आहेत.
