>> मुख्यमंत्री डॉ. प्रमोद सावंत यांची माहिती
गोव्यात येत्या १० ते १३ डिसेंबर ह्या दरम्यान भारतीय आंतरराष्ट्रीय विज्ञान महोत्सव २०२१ चे आयोजन करण्यात येणार असल्याची घोषणा काल मुख्यमंत्री डॉ. प्रमोद सावंत यांनी केली. केंद्रीय भू-विज्ञान मंत्रालय, विज्ञान आणि तंत्रज्ञान विभाग, विज्ञान भारती आणि राष्ट्रीय ध्रुवीय आणि सागरी संशोधन संस्थेने गोवा सरकारच्या सहकार्याने या महोत्सवाचे आयोजन केले आहे. केंद्रीय मंत्री जिंतेद्र सिंग यांच्या हस्ते ह्या महोत्सवाचे उद्घाटन होणार असल्याचे यावेळी मुख्यंत्री डॉ. सावंत यांनी सांगितले.
यावेळी पुढे बोलताना मुख्यमंत्री डॉ. सावंत यांनी या महोत्सवामुळे विद्यार्थी तसेच जनसामान्यांमध्ये विज्ञानाविषयीची रूची निर्माण होऊन संशोधन आणि नवोन्मेषाला चालना मिळण्यार असल्याचे मत व्यक्त केले.
ह्या महोत्सवामध्ये गोव्यातील पाच हजार विद्यार्थ्यांच्या तीन उपक्रमांची गिनीज बुक ऑफ वर्ल्ड रेकॉर्डस्‌मध्ये नोंद होणार आहे. तर ७ हजार विद्यार्थी पावसाच्या पाण्याची साठवणमध्ये (रेन हार्वेस्टिंग) सहभागी होणार आहेत. तसेच महोत्सवात विद्यार्थ्यांना जगातील सर्वांत मोठी दुर्बीण पाहण्याची संधी मिळणार आहे. ह्या महोत्सवात विद्यार्थी गगनयान रॉकेटची प्रतिकृतीही तयार करणार आहेत.
या महोत्सवाची संकल्पना ही ‘विज्ञानातील सर्जनशीलता साजरी करणे’ ही आहे. या महोत्सवात भव्य विज्ञान आणि तंत्रज्ञान प्रदर्शनावर एकूण १२ कार्यक्रमांचे आयोजन करण्यात येणार आहे. गेल्या वर्षी कोविड महामारीमुळे महोत्सव आभासी पद्धतीने आयोजित करण्यात आला होता. यंदा तो आभासी व प्रत्यक्ष असा हायब्रिड पद्धतीने आयोजित करण्यात येणार असल्याची माहिती यावेळी मुख्यमंत्र्यांनी दिली.
