राज्य सरकारचे खाते प्रमुख, सरकारी अधिकाऱ्यांना रजा किंवा अधिकृत कामासाठी परराज्यात दौऱ्यावर जाण्यापूर्वी कार्मिक खात्याची परवानगी घेणे बंधनकारक करण्यात आले आहे. परवानगी न घेता रजेवर जाणाऱ्या अधिकाऱ्यांच्या विरोधात सीसीएस (रजा) नियमांचे उल्लंघन केल्याप्रकरणी कारवाई केली जाणार आहे, असा इशारा कार्मिक खात्याने दिला आहे. यासंबंधीचे परिपत्रक अवर सचिव दुर्गा किनळेकर यांनी जारी केले आहे. कार्मिक खात्याच्या प्रशासकीय नियंत्रणाखाली असलेले काही खाते प्रमुख, वरिष्ठ अधिकारी पूर्व परवानगीशिवाय रजेवर अथवा अधिकृत दौऱ्यावर जात असल्याचे निदर्शनास आले आहे. मात्र याबाबत कार्मिक खात्याला माहिती दिली जात नाही. त्यामुळे त्या खात्याच्या सुरळीत कामकाजावर परिणाम होतो. तसेच, सीसीएस (रजा) नियम, 1972 आणि त्यामधील संबंधित सूचनांचे उल्लंघन होत आहे, असे परिपत्रकात म्हटले आहे. वरिष्ठ अधिकारी, खाते प्रमुख, जीसीएस, जीपीएसच्या अधिकाऱ्यांनी रजेवर किंवा अधिकृत दौऱ्यावर जात असताना याबाबत आगाऊ सूचना देणे, अनेक दिवस आधी कार्मिक खात्याला अर्ज सादर करणे आवश्यक आहे. त्यामुळे कार्मिक खात्यातील सक्षम अधिकाऱ्यांची मंजुरी घेण्यासाठी पुरेसा वेळ उपलब्ध होईल. खाते प्रमुखांसह सर्व अधिकाऱ्यांनी कार्मिक खात्याच्या पूर्वपरवानगी शिवाय रजेवर अथवा अधिकृत दौऱ्यावर जाऊ नये, असे परिपत्रकात स्पष्ट केले आहे.
