मच्छीमार व्यापार्‍यांच्या नोंदणी शुल्कात कपात

0
12

गोवा सरकारच्या मच्छीमारी खात्याने राज्यातील मत्स्य व्यापार्‍यांसाठी नोंदणी शुल्क सुधारित करणारी अधिसूचना काल जारी केली असून मासळी व्यापार्‍यांच्या नोंदणी शुल्कात कपात केली आहे.

सागरी मासेमारी नियमन कायद्यांतर्गत मत्स्यव्यवसाय विभागाकडे नोंदणीकृत मासेमारी जहाज नसलेल्या व्यापार्‍यांना नोंदणी शुल्क म्हणून १.२५ लाख रुपये द्यावे लागतील. कायद्यांतर्गत नोंदणीकृत मासेमारी जहाज असलेल्यांसाठी नोंदणी शुल्क ५० हजार रुपये आकारण्यात येणार आहे. यापूर्वी, मासळी व्यापार्‍यांसाठी नोंदणी शुल्क २ लाख रुपये, सुरक्षा ठेवीसह २०,००० रुपये होते.

शुल्क भरण्याची पावती मत्स्यपालन सहकारी संस्था, असोसिएशन किंवा फेडरेशनच्या नावावर असेल, असे या संदर्भात जारी केलेल्या अधिसूचनेत नमूद केले आहे. मत्स्यव्यवसाय सहकारी संस्था, संघटना किंवा फेडरेशन कोणत्याही मासेमारी व्यावसायिकांना खात्याने नोंदणी केलेल्या कोणत्याही मासेमारी जहाजातून मासे खरेदी करण्यास थांबवणार नाही.

तसेच, व्यापारी मासेमारी जहाजांच्या मालकाकडून मासे खरेदी करण्यास नकार देणार नाही, असे अधिसूचनेत म्हटले आहे. दरम्यान, दुसर्‍या अधिसूचनेद्वारे, विभागाने वैयक्तिक मच्छीमारांना त्यांच्या माशांची राज्यामध्ये किंवा राज्याबाहेर वाहतूक करण्यासाठी प्रतिहंगाम प्रतिजहाज शुल्क निर्दिष्ट करणारा आदेश रद्द केला आहे.