पंजाबमधील पठाणकोट येथील वायूदलाच्या तळावर 7 वर्षांपूर्वी दहशतवाद्यांनी हल्ला केला होता. या हल्ल्यात 7 भारतीय जवान शहीद झाले होते. या हल्ल्याचा सूत्रधार पाकिस्तानमध्ये ठार झाला. शाहीद लतीफ असे या दहशतवाद्यांच्या म्होरक्याचे नाव असून, सियालकोट येथे काही अज्ञातांनी त्याची गोळ्या घालून त्याचा खून केला. लतीफ हा एनआयएच्या मोस्ट वॉन्टेड यादीत होता. लतीफ हा जैश-ए-मोहम्मद या दहशतवादी संघटनेत होता. तो जैशच्या दहशतवाद्यांना भारतात पाठवत होता.
पाकिस्तानी माध्यमांनी दिलेल्या वृत्तानुसार, सियालकोटजवळच्या एका मशिदीत शाहीदची हत्या करण्यात आली. दोन हल्लेखोर मोटारसायकलवरून आले, त्यांनी शाहीदवर गोळ्या झाडल्या आणि तिथून फरार झाले. या हत्याकांडानंतर पोलिसांनी सियालकोट भागात नाकाबंदी केली. तसेच हल्लेखोरांना पकडण्यासाठी पोलिसांनी शोधमोहीम हाती घेतली होती.
शाहीद हा पाकिस्तानच्या पंजाब प्रांतातील गुजरानवाला भागातला रहिवासी होता. तसेच तो अनेक वर्षांपासून जैश-ए-मोहम्मद या दहशतवादी संघटनेसाठी काम करत होता. तो जैशच्या सियालकोट सेक्टरचा कमांडर होता. भारतात दहशतवादी पाठवणे, हल्ले घडवून आणणे, दहशतवाद्यांना प्रशिक्षण देणे, हल्ल्यांची योजना आखणे इत्यादी कामे लतीफ करत होता. पठाणकोट हल्ल्याची योजनाही त्यानेच आखली आणि त्यानेच दहशतवाद्यांना भारतात पाठवले होते.
शाहीद लतीफ याला 12 नोव्हेंबर 1994 रोजी अटक करण्यात आली होती. भारतातल्या तुरुंगात 16 वर्षे शिक्षा भोगल्यानंतर 2010 मध्ये त्याला वाघा सीमेवरून पाकिस्तानात पाठवण्यात आले होते. त्यानंतर सहा वर्षांनी 2016 मध्ये त्याने जैशचे दहशतवादी भारतात पाठवून पठाणकोट येथील वायूदलाच्या तळावर हल्ला घडवून आणला होता. या हल्ल्यात भारताचे सात जवान शहीद झाले होते.
