>> शुक्रवारी एकाचा मृत्यू, ९७ बाधित
राज्यातील कोरोनाबाधित सक्रिय रुग्णांची संख्या काल शुक्रवारी पुन्हा एक हजाराच्या खाली आली असून ती ९९२ एवढी झाली आहे. गेल्या चोवीस तासांत कोरोनामुळे एकाच्या मृत्यूची नोंद झाली. त्यामुळे राज्यातील कोरोनाने मृत्यू झालेल्यांची एकूण संख्या ३१५७ झाली आहे. तसेच काल राज्यात ९७ नवे कोरोनाबाधित रुग्ण सापडले. काल राज्यातील ४६८५ जणांची स्वॅब चाचणी करण्यात आली. कोरोनाचा संसर्ग झालेल्या राज्यातील एकूण रुग्णांची संख्या १,७१,७०५ एवढी झाली आहे. कोरोना रुग्ण बरे होण्याचे प्रमाण ९७.५८ टक्के आहे.
चोवीस तासांत १३३ कोरोनामुक्त
गेल्या चोवीस तासांत राज्यात १३३ जण बरे झाले आहेत. तर इस्पितळांतून काल ११ जणांना डिस्चार्ज देण्यात आला. सध्या राज्यातील कोरोनामुक्त झालेल्यांची एकूण संख्या १,६७,५५६ एवढी झाली आहे, अशी माहिती आरोग्य खात्याने प्रसिद्धीस दिलेल्या पत्रकात दिली आहे. तसेच काल नव्याने इस्पितळात १७ जणांना भरती करण्यात आले. आतापर्यंत इस्पितळात उपचार घेतलेल्यांची संख्या २८,७१२ एवढी असून गृहविलिनीकरणात राहिलेल्यांची संख्या १,१९,५१६ एवढी आहे. राज्यात आतापर्यंत १०,८३,५६१ एवढ्या लोकांची कोरोना संसर्गाची चाचणी करण्यात आलेली आहे.
