>> किरकोळ अपघाताचे निमित्त, अनेक जखमी
झुवारीनगर येथे काल संध्याकाळी झालेल्या अपघातामुळे भाजप व कॉंग्रेस समर्थक यांच्यात बाचाबाची होऊन प्रकरण हातघाईवर आले. या घटनेमुळे दोन्ही पक्षाचे अनेक समर्थक जखमी झाले. यातील काही जणांना बांबोळी येथे गोमेकॉत उपचारासाठी दाखल करण्यात आले. दरम्यान, झुवारीनगर येथे तणाव निर्माण झाल्याने मोठ्या प्रमाणात पोलीस तैनात करण्यात आले आहेत.
कुठ्ठाळीचे कॉंग्रेस उमेदवार मारियान रॉड्रिगीस यांच्या कारला भाजपचे कार्यकर्ते तथा साकवाळचे पंच रंगप्पा कमक यांनी दुचाकीने धडक दिली. यामुळे कारचे काही प्रमाणात नुकसान जाले. वेर्णा पोलिसांनी अपघाताचा पंचनामा केला. मात्र यावेळी अपघातस्थळी जमलेल्या भाजप समर्थकांनी वाहने काढण्यास विरोध केला. त्यावरून तेथे जमलेल्या दोन्ही पक्षांच्या कार्यकर्त्यांत वादविवाद झाले. याचे पर्यावसन हातघाईत झाले. दोन्ही गटातील समर्थकांनी एकमेकांवर पोलिसांसमक्ष काचेच्या बाटल्यांनी हल्ले केले. यामुळे दोन्ही गटातील कार्यकर्ते जखमी झाले. मारियान यांचे बंधू वालिन्स, मारिओ, मल्लेश हे समर्थक गंभीर जखमी झाल्याने तसेच मारियान यांचा रक्तदाब वाढल्याने त्यांना गोमेकॉत दाखल करण्यात आले. याबाबत वेर्णा पोलीस अधिक चौकशी करत असून रात्री उशिरापर्यंत जबान्या चालू होत्या.
