सुरावली येथे रस्त्यालगत झुडपात रिक्षाचालक बी शैफुल्ला (१८) या तरुणाचा मृतदेह सापडला असून त्याचा खून झाल्याचा संशय व्यक्त करण्यात येत आहे. नेसाय सां जुझे आरियाल येथील शैफुल्ला हा रिक्षाने भाडे घेऊन गेला होता. मात्र सुरावली येथे रस्त्यालगत दरवाजा उघडलेल्या अवस्थेत रिक्षा उभी होती व जवळच झुडुपात शैफुल्ला पडलेला दिसला.
या प्रकरणी पोलिसांना माहिती मिळताच पोलिसांनी त्वरित तेथे धाव घेतली. पोलिसांनी तपास केला असता शैफुल्लाच्या गळ्यावर जखमा दिसून येत होत्या. त्याला कोणीतरी मारहाण केली असावी असा संशय पोलिसांनी व्यक्त केला. त्याला त्वरित हॉस्पिसियूत दाखल केले असता डॉक्टरांनी त्याला मृत घोषित केले. दुपारी त्याने वडिलांना ८ ते १० हजार रुपये घेऊन यायला सांगितले होते. त्यानुसार वडिलांनी तयारी केली व शैफुल्लाला फोन केला असता त्याने फोन उचलला नाही. त्यामुळे वडिलांनी घटनास्थळी धाव घेतली असता शैफुल्ला बेशुद्धावस्थेत असलेला त्यांना आढळला.
यानंतर पोलीसही घटनास्थळी दाखल झाले. अधिक तपास सुरू असून आज गुरूवारी शवचिकित्सा केली जाणार आहे.
