इंडियन सुपर लीगमध्ये शनिवारी येथील श्री शिवछत्रपती क्रीडा संकुलात एफसी पुणे सिटीची नॉर्थईस्ट युनायटेड एफसीविरुद्ध लढत होत आहे. घरच्या मैदानावर पुण्याला फॉर्मसाठी झगडावे लागत आहे. त्यातच मुख्य प्रशिक्षक रँको पोपोविच यांना निलंबित करण्यात आले आहे. यानंतरही पुण्याला फॉर्म गवसण्याची आशा आहे. चौथ्या मोसमात धडाकेबाज प्रारंभ केलेल्या एफसी गोवाविरुद्ध पुण्याने त्यांच्याच मैदानावर शानदार विजय संपादन केला. चिवट बचाव वैशिष्ट्‌य असलेल्या जमशेदपूर एफसीला त्यांच्याच मैदानावर हरविण्यातही पुण्याने यश मिळविले. असे असले तरी घरच्या मैदानावर पुण्याला चार पैकी तीन सामने गमवावे लागले आहेत.
आता पुण्याची नॉर्थईस्टशी लढत होत आहे. हा संघ गुणतक्त्यात खालच्या नवव्या स्थानावर आहे. त्यांच्याविरुद्ध पुण्याला प्रशिक्षक पोपोविच यांची उणीव जाणवेल. सर्बियाच्या पोपोवीच यांना शीस्तभंगाबद्दल चार सामन्यांसाठी निलंबित करण्यात आले आहे. गोव्यातील सामन्यानंतर पंचांशी गैरवर्तनामुळे त्यांनी ५०व्या कलमाचा, तर आक्रमक वर्तनामुळे ५८व्या कलमाचा भंग केला. त्यामुळे ही कारवाई झाली. त्यांची उणीव भासणे अटळ असले तरी सहाय्यक प्रशिक्षक व्लादिचा ग्रुजीच यांच्यासमोर आणखी मोठे आव्हान आहे. बाहेरच्या मैदानावरील कामगिरीची घरच्या मैदानावर पुनरावृत्ती करण्याचा मार्ग त्यांना शोधावा लागेल.
