राज्यातील पणजी महानगरपालिका, सहा नगरपालिका, साखळी पालिका पोटनिवडणूक, नावेली जिल्हा पंचायत आणि विविध ग्रामपंचायतींच्या १८ प्रभागांच्या पोटनिवडणुकीची मतमोजणी आज सोमवार २२ मार्च रोजी सकाळी ८ वाजल्यापासून संबंधित तालुकास्तरावर केली जाणार आहे. पालिका निवडणुकीत काही ठिकाणी धक्कादायक निकालांची शक्यता व्यक्त केली जात आहे.
पणजी महानगरपालिकेच्या निवडणुकीतील मतमोजणी फार्मसी महाविद्यालयाच्या आवारात केली जाणार आहे. पणजी महानगरपालिका निवडणुकीसाठी मतदानयंत्राच्या साहाय्याने मतदान घेतल्याने निवडणुकीचे निकाल लवकर जाहीर होण्याची शक्यता आहे.
सहा नगरपालिका आणि नावेली जिल्हा पंचायत पोटनिवडणुकीसाठी मतपत्रिकेच्या माध्यमातून मतदान घेतल्याने मतमोजणीला थोडा अधिक वेळ लागण्याची शक्यता आहे.
राज्यातील निवडणूक झालेल्या नगरपालिका, पंचायतींमधील सर्वांचे लक्ष निवडणूक मतमोजणीकडे लागले आहे.
पणजी महानगरपालिकेत भाजप आणि स्थानिक आमदार बाबूश मोन्सेरात यांच्या पॅनलसमोर ‘आम्ही पणजीकर’ पॅनलच्या काही उमेदवारांनी आव्हान उभे केले आहे. त्यामुळे निवडणूक निकालाकडे सर्वांचे लक्ष लागले आहे. विद्यमान महापौर, उपमहापौर, विद्यमान नगरसेवक, माजी नगरसेवक निवडणूक रिंगणात आहेत.
डिचोलीच्या निकालाकडे सर्वांची नजर
डिचोली पालिका निवडणुकीतील ६८ उमेदवारांचे भवितव्य आज ठरणार असून एकूण १४ प्रभागांची मतमोजणी सकाळी ८ वाजता झांट्ये महाविद्यालयाच्या जिमखाना हॉल येथे होणार असून सर्व तयारी पूर्ण करण्यात आल्याची माहिती निर्वाचन अधिकारी दीपक वायंगणकर व प्रवीणजय पंडित यांनी दिली. एकूण पाच पॅनल्स रिंगणात असून त्यांच्यासाठी ही लढाई प्रतिष्ठेची ठरणार आहे. काही ठिकाणी धक्कादायक निर्णय अपेक्षित आहेत.
साखळी पालिका पोटनिवडणुकीचा निकाल आज लागणार असून भाजप की कॉंग्रेस या बाबत उत्सुकता आहे. या जागेवर साखळी पालिका मंडळाच्या स्थैर्याचा प्रश्न अवलंबून आहे. कारापूर तसेच मुळगाव पंचायतीत पोटनिवडणुकीचा निकालही आज लागेल.
काणकोणातील मतमोजणीही आज
काणकोण नगरपालिकेच्या १२ प्रभागांसाठी झालेल्या मतदानाची मतमोजणी आज २२ रोजी सकाळी ८ वा. पासून सुरू होणार आहे. ही मतमोजणी काणकोणच्या प्रशासकीय इमारतीच्या सभागृहात सुरू करण्यात येणार असून त्यासाठी २ टेबले मांडण्यात आली आहेत. पहिल्या टप्प्यात १ ते ६ वार्डांची मतमोजणी होणार असून दुसर्‍या टप्प्यात ७ ते १२ वॉर्डांची मतमोजणी हाती घेण्यात येणार आहे. दुपारी १२ पर्यंत ही प्रक्रिया पूर्ण करण्यात येणार असल्याची माहिती काणकोणचे निर्वाचन अधिकारी उदय प्रभुदेसाई यांनी दिली.
या पालिकेच्या १२ प्रभागांसाठी एकूण ३१ उमेदवार निवडणुकीत उतरले होते. त्यासाठी एकूण १०१५७ मतदारांपैकी ८८४४ मतदारांनी आपला मतदानाचा हक्क बजावला असून मतदारांनी नेमका कोणाच्या बाजूने कौल दिला ते आज दिसून येणार आहे.
पेडण्यात कोण विजयी?
पेडणे नगरपालिकेच्या निवडणुकीत अधिकाधिक मतदारांनी आमच्या बाजूने मतदान केल्यामुळे आज आमचाच विजय होईल असा विश्वास बहुतेक उमेदवारांनी केला आहे. भाजपा तर्फे दहाही प्रभागांत उमेदवार उभे केले होते. मात्र मगो, कॉंग्रेस व गोवा फॉरवर्ड यांचा सहभाग निवडणुकीत दिसला नाही. या निवडणुकीत भाजपाने आपली ताकद लावली होती. पेडण्यात एकूण ९१.०२ टक्के मतदान झाल्यामुळे निकालाबाबत औत्सुक्य आहे.
