गुजरातच्या पालिका निवडणुकांमध्ये भाजपला चार पालिकांमध्ये बहुमत मिळाले आहे. गुजरातच्या नगरपालिका निवडणुकीत भाजपने शेवटचे वृत्त हाती येईपर्यंत ३८९ जागा जिंकल्या होत्या. कॉंग्रेसने ३९ जागा तर आम आदमी पक्षाने १४ आणि बसपाने ३ जागा जिंकल्या. त्याचवेळी एका जागेवर अपक्ष उमेदवार विजयी झाला आहे. ५७५ जागांसाठी मतमोजणी रात्री उशिरापर्यंत सुरू होती.
सर्व महापालिकांमध्ये
भाजपला बुहमत
गुजरातमधील पालिका निवडणुकांमधील शानदार विजयाबद्दल भाजप अध्यक्ष जे. पी. नड्डा यांनी नेत्यांचे अभिनंदन केले आहे. गुजरातमधील सर्व ६ महापालिकांमध्ये भाजपने मोठ्या बहुमताने विजय मिळवला आहे. या यशाबद्दल मुख्यमंत्री विजय रुपाणी, प्रदेशाध्यक्ष सी. आर. पाटील आणि पक्षाचे कार्यकर्ते आणि सर्व मतदारांचे आभार मानतो असे नड्डा म्हणाले. चुरशीच्या झालेल्या सूरत जिल्ह्यात भाजपने ९३ जागा जिंकल्या आहेत. दुसर्‍या क्रमांकावर अरविंद केजरीवाल यांचा आम आदमी पक्ष असून त्यांनी २३ जागा जिंकल्या आहेत. मात्र कॉंग्रेसला तेथे एकही जागा मिळू शकलेली नाही.
