>> उत्तरेत पत्रादेवी तर दक्षिणेत मडगावातून सुरूवात
इंडिया आघाडीचे गोव्यातील दोन्ही उमेदवार उद्या मंगळवार दि. 9 एप्रिलपासून आपल्या प्रचाराला सुरूवात करणार आहेत. उत्तरेतील प्रचार हुतात्मा स्मारक पत्रादेवी आणि दक्षिण गोव्यातील प्रचार लोहिया मैदान मडगाव येथून सुरूवात करण्यात येणार असल्याची माहिती काँग्रेसचे गोवा प्रदेशाध्यक्ष अमित पाटकर यांनी
दिली.काँग्रेस पक्षाने लोकसभा निवडणुकीसाठी उत्तरेतून ॲड. रमाकांत खलप आणि दक्षिणेतून कॅ. विरियातो फर्नांडिस यांना इंडियातर्फे उमेदवारी दिली आहे. उद्या मंगळवारी हुतात्मा स्मारक, पत्रादेवी येथून सकाळी 9 वा. आणि लोहिया मैदान, मडगाव येथून सकाळी 11.30 वा. त्यांच्या प्रचाराला प्रारंभ करणार आहे.
ऐतिहासिक महत्त्व असलेल्या दोन्ही ठिकाणी इंडिया आघाडीचे सर्व नेते उपस्थित राहणार असून प्रचाराच्या प्रारंभाने गोवा वाचवा चळवळ सुरू होणार असल्याचे पाटकर यांनी सांगितले.
आज लोकशाही धोक्यात आहे. भाजपने सुरू केलेल्या पक्षांतरांमुळे आपल्या संविधानावर हल्ला होत आहे. आमची जमीन भांडवलदारांनी ताब्यात घेतली आहे. गोव्याची ओळख जपण्याची वेळ आली आहे. भाजपची हुकूमशाही राजवट संपवण्यासाठी आपण सर्वांनी संघटित होऊ या, असे आवाहन पाटकर यांनी केले आहे.
गोमंतकीयांनी हुतात्मा स्मारक, पत्रादेवी आणि लोहिया मैदान, मडगाव येथे मोठ्या संख्येने जमा व्हावे आणि इंडियाच्या उमेदवारांना आपला बहुमोल पाठिंबा द्यावा असे आवाहन करत श्री. पाटकर यांनी, आम्ही तुम्हाला आमचे दोन्ही उमेदवार संसदेत गोव्याचा आवाज बनून काम करतील असे वचन देत असल्याचे सांगितले.
