पश्चिम बंगालमध्ये एमबीबीएसच्या आणखी एका विद्यार्थिनीवर बलात्कार करण्यात आला आहे. दुर्गापूरमधील एका खासगी वैद्यकीय महाविद्यालयाच्या रुग्णालयाजवळ या विद्यार्थिनीवर बलात्कार करण्यात आला. पीडित मुलगी ओडिशातील जलेश्वर येथील रहिवासी आहे. ती मित्रासह जेवायला बाहेर गेली होती, त्याचवेळी आणखी दोन-तीन पुरूष आले आणि तिच्यावर बलात्कार केला. या घटनेवेळी पीडितेचा मित्र तिला तिथेच सोडून पळून गेला. बलात्काराच्या या घटनेनंतर पोलिसांनी आतापर्यंत अपू बौरी (21), फिरदौस शेख (23), शेख रियाझुद्दीन (31) आणि शेख सोफिकूल या चौघांना अटक केली असून त्यांना न्यायालयात हजर केले जाणार आहे. याबाबत बोलताना मुख्यमंत्री ममता बॅनर्जी यांनी, मुलींना रात्रीच्या वेळी बाहेर (कॉलेजला) जाऊ देऊ नये. त्यांनी स्वतःचे रक्षणही केले पाहिजे असे वादग्रस्त विधान केले आहे. पोलीस आरोपींचा शोध घेत आहेत. कोणालाही सोडले जाणार नाही. जो कोणी दोषी आढळेल त्याला कठोर शिक्षा केली जाईल असा इशाराही त्यांनी दिला आहे.
