>> कुर्टीत गोवा डेअरीसमोर साखळी उपोषण सुरू ठेवणार
गोवी डेअरीचे प्रशासक आणि दूध उत्पादक संस्थांच्या प्रतिनिधींमध्ये झालेली पशूखाद्य दरवाढ मागे घेण्याबाबतची चर्चा फिसकटल्याने आता गोवा डेअरीच्या गेटसमोर साखळी आंदोलन सुरू करण्याचा निर्णय दूध उत्पादकांनी घेतला आहे. काल सोमवारी सकाळी गोवा डेअरीसमोर जमलेल्या दूध उत्पादकांनी हा निर्णय घेतला.
दोन दिवसांपूर्वी पशूखाद्य दरवाढीवरून दूूध उत्पादकांनी गोवा डेअरी इमारतीचे प्रवेशद्वार अडवून ठेवले होते. त्यावेळेला गोवा डेअरीचे प्रशासक नसल्याने याबाबत चर्चा झाली नव्हती. काल दूध उत्पादक गोवा डेअरीसमोर आल्यानंतर कुर्टीतील सहकार भवन सभागृहात गोवा डेअरीचे प्रशासक अरविंद खुटकर व दूध उत्पादक संस्थांच्या प्रतिनिधींची बैठक झाली. त्यात पशूखाद्य दरवाढ मागे घेण्याची मागणी दूध उत्पादकांनी केली. त्यावेळी श्री. खुटकर यांनी दोन प्रस्ताव दूध उत्पादकांसमोर ठेवले. गोवा डेअरीचा पशूखाद्य प्रकल्प तोट्यात असल्याने महिन्याकाठी अठ्ठावन्न हजार रुपये तोटा होत आहे, त्यामुळेच ही दरवाढ करण्यात आली आहे. यासंबंधीचा निर्णय घेऊन तो मंजुरीसाठी सरकारकडे पाठवल्यावर त्याला सरकारकडून मान्यता देण्यात आली.
दूध उत्पादकांनी पशूखाद्य प्रकल्प नुकसानाची जबाबदारी स्वीकारावी व बहुतांश दूध सोसायट्यांनी यासंबंधीचे निवेदन सरकारला द्यावे. तसेच गेल्या वर्षी महापुरामुळेही दरवाढ झाली आहे. त्यासाठी दूध उत्पादकांनी अर्थसाह्यासाठी एक निवेदन द्यावे व त्यानुसार सरकारकडून विशेष अनुदान घेऊन ते दूध उत्पादकांना देण्यासाठी आपण प्रयत्न करीन. मात्र दूध उत्पादकांनी एकतरी पशुखाद्य दर कमी करा किंवा दूध उत्पादकांना दूध दरामागे वाढ करा, अशी मागणी केली.
दूध उत्पादकांचे प्रशासकांना निवेदन
गेल्या १७ रोजी गोवा डेअरीच्या प्रशासनाविरोधात निषेध व्यक्त करण्यासाठी आंदोलन छेडल्यानंतर गोवा डेअरीचे सुमारे साठ कामगार आपली कामाची जागा सोडून प्रशासकीय संकुलामध्ये घुसले व त्यांनी धक्काबुक्की केली असल्याचा आरोप गोवा दूध संघाशी संबंधित शेतकरी व आंदोलकांनी केला आहे. हे गोवा डेअरीचे बहुतांश कर्मचारी मद्यपान करून आले होते, असा आरोपही यावेळी दूध उत्पादकांनी केला असून त्यासंबंधीचे एक निवेदन गोवा डेअरीच्या प्रशासकांना देण्यात आले आहे.
