आयसीसी अंडर १९ क्रिकेट स्पर्धेत काल बांगलादेशने कॅनडाचा ६६ धावांनी पराभव केला. तौहिद हृदोय (१२२) याने झळकावलेले शतक तसेच अफिफ हुसेन याने फलंदाजीत ५० धावा करतानाच गोलंदाजीत पाच बळी घेत केलेली अष्टपैलू कामगिरी बांगलादेशला सलग दुसरा विजय मिळवून देण्यास पुरेशी ठरली. ‘सी’ गटात असलेल्या बांगलादेशने आपल्या पहिल्या साखळी सामन्यात नामिबियाचा ८७ धावांनी पराभव केला होता.
काल कॅनडाने नाणेफेक जिंकून बांगलादेशने प्रथम फलंदाजीचे निमंत्रण दिले. बांगलादेशने निर्धारित ५० षटकांत ८ बाद २६४ धावा फलकावर लगावल्या. त्यांच्या तौहिद हृदोय याने १२६ चेंडूंत ९ चौकार व १ षटकारासह १२२ धावांची शतकी खेळी साकारली. सलामीवीर मोहम्मद नईमने ४७, अफिफ हुसेनने ५० धावा करत मोलाचे योगदान दिले. कॅनडाकडून फैझल जामखंडी याने ४८ धावांत ५ गडी बाद केले. आव्हानात्मक लक्ष्याचा पाठलाग करताना कॅनडाचा डाव ४९.३ षटकांत १९८ धावांत संपला. त्यांच्याकडून कर्णधार अर्सलान खान याने सर्वाधिक ६३ धावांचे योगदान दिले. अफिफ हुसेनने गोलंदाजीतही चमक दाखवताना ४३ धावांत ५ फलंदाजांना माघारी पाठवले. सामनावीर पुरस्काराने त्याचा गौरव करण्यात आला.
