बस दरीत कोसळून सात जणांचा मृत्यू

गुजरातमधील सापुतारा येथे नाशिक-गुजरात महामार्गावर काल एक खासगी बस 200 फूट खोल दरीत कोसळून भयानक अपघात झाला. या दुर्घटनेत 7 जणांचा मृत्यू झाला, तर 15 जण गंभीर जखमी झाले. काल पहाटे 4 वाजून 15 मिनिटांच्या सुमारास सापुतारा हिल स्टेशनजवळ बस चालकाचे गाडीवरील नियंत्रण सुटल्याने हा अपघात झाला, अशी माहिती पोलीस अधीक्षक एस. जी. पाटील यांनी दिली. अपघात झालेल्या बसमधून 48 प्रवासी प्रवास करत होते. ही बस रस्त्याच्या कडेला लावण्यात आलेले बॅरिकेड्स तोडून खोल दरीत कोसळली, असेही त्यांनी सांगितले. बसमधील 48 भविकांना घेऊन बस नाशिकच्या त्र्यंबकेश्वरहून गुजरातमधील द्वारका येथे जात होती, यादरम्यान हा अपघात झाला. दरम्यान बसमधील भाविक हे मध्य प्रदेशमधील गुणा, शिवपुरी आणि अशोक नगर जिल्ह्यातील आहेत.