>> 10 नागरिकांचा मृत्यू; 40 हजार एकर क्षेत्रात पसरली आग; कोट्यवधींचे नुकसान
अमेरिकेतील कॅलिफोर्निया राज्यात लॉस एंजेलिस शहराच्या आसपास भडकलेल्या आगीमुळे सुमारे 10 हजार घरे, इमारती व व्यावसायिक आस्थापने जळून खाक झाली आहेत. याशिवाय सुमारे 30 हजार घरांचे नुकसान झाले आहे. या वणव्यात आतापर्यंत 10 नागरिकांचा मृत्यू झाला आहे. गेल्या 4 दिवसांपासून धुमसत असलेली ही आग सुमारे 40 हजार एकर परिसरात पसरली आहे. त्यामध्ये 29 हजार एकर जमीन पूर्णपणे जळून खाक झाली आहे. या भीषण घटनेत अनेक जणांचे कोट्यवधी रुपयांचे नुकसान झाले आहे. या शहर परिसरात सध्या आगीच्या ज्वाळा आणि धूर पसरला आहे.
कॅलिफोर्नियामध्ये शुक्रवारी सलग चौथ्या दिवशी आगीचे तांडव सुरू आहे. ही आग आटोक्यात आणण्यासाठी अग्निशमन दलाचे जवान अथक प्रयत्न करत आहेत; मात्र मोठ्या प्रमाणात भडकलेली आग आणि अपुरे मनुष्यबळ यामुळे आगीवर नियंत्रण मिळवण्यात अडचणी येत आहेत.
लॉस एंजेलिस शहरात अमेरिकेतील चित्रपट आणि टीव्ही क्षेत्रातील अनेक दिग्गज कलाकारांची घरे आहेत. या वणव्याचा शहरातील पॅसिफिक पॅलिसेड्स, पासाडेना, अल्ताडेना आणि हॉलिवूड हिल्स या भागांना मोठा फटका बसला आहे. त्यातील हॉलिवूडमधील अनेक प्रसिद्ध सेलिब्रेटींच्या घरांचा समावेश आहे. आगीमुळे सुमारे 10 लाख लोक विस्थापित झाले आहेत.
या भागात गेल्या वर्षीच्या मे महिन्यापासून जराही पाऊस पडला नाही. त्यामुळे येथील अत्यंत कोरड्या वातावरणामुळे या भागात आग वेगाने पसरल्याचे सांगितले जात आहे. त्यातच वेगाने वारा सुटल्याने आगीची तीव्रता कित्येक पटीने वाढली तसेच अग्निशमन विभागालाही अडचणींचा सामना करावा लागत आहे. या भागात फक्त रस्ते उरले आहेत. येथील सर्व घरे आगीमुळे नष्ट झाली आहेत.
288 कोटींचे घर आगीच्या भक्ष्यस्थानी
या वणव्यादरम्यान 288 कोटींचे एक आलिशान घर आगीत जळतानाचा व्हिडिओ सोशल मीडियावर व्हायरल झाला आहे. अमेरिकेतील ऑनलाइन रिअल इस्टेट मार्केटप्लेस ‘झिलो’वर हे घर 35 मिलियन डॉलर्स (अंदाजे 288 कोटी रुपये) किमतीला विक्रीसाठी उपलब्ध होते; पण लॉस एंजेलिसच्या जंगलात लागलेल्या वणव्यादरम्यान हे घर पूर्णपणे जळू खाक झाले आहे. त्याचा व्हिडीओ व्हायरल झाला असून, त्यामध्ये या विनाशकारी आगीची दाहकता पाहायाला मिळत आहे. दुरुन घेतलेल्या या व्हिडीओमध्ये हे आलिशान घर जळताना दिसत आहे.
