‘त्या’ जहाजाच्या आगीवर नियंत्रण, एकाचा मृत्यू

गोव्याच्या किनारपट्टीवर मर्चंट नेव्हीच्या जहाजाला 19 जुलै रोजी लागलेली आग आटोक्यात आली आहे. भारतीय तटरक्षक दलाच्या अधिकाऱ्याने सांगितले की जहाजावर 22 खलाशी होते. त्यातील एकाचा मृत्यू झाला आहे. मात्र सध्या कोणाच्याही जीवाला धोका नाही. गुजरातमधील मुंद्रा येथून 1,154 कंटेनर घेऊन श्रीलंकेतील कोलंबोकडे निघालेल्या एमव्ही मार्स्क फ्रँकफर्ट जहाजाला गोव्याच्या किनाऱ्यापासून 102 नॉटिकल मैल अंतरावर आग लागली. त्यात बेंझिन आणि सोडियम सायनेटसारखा धोकादायक माल होता. शुक्रवारी हेलिकॉप्टरच्या मदतीने जहाजावर कोरडी रासायनिक पावडर टाकण्यात आली, त्यामुळे आग आटोक्यात आणण्यात मदत झाली. जहाजाच्या ज्या भागात धोकादायक माल ठेवण्यात आला होता त्या भागात आग लागली नाही. आग नियंत्रणात आली असली तरी आग विझवण्याचे काम अजूनही सुरू आहे. हे जहाज 21 जुलै रोजी कोलंबो, श्रीलंकेला पोहोचणार होते. जहाजात शॉर्ट सर्किटमुळे आग लागली.