>> आज शपथविधी; कनकवर्धन सिंहदेव आणि प्रभाती परिदा उपमुख्यमंत्री
केंद्रीय निरीक्षक तथा संरक्षणमंत्री राजनाथ सिंह आणि भूपेंद्र यादव यांनी काल भुवनेश्वरमध्ये पक्षाच्या आमदारांसोबत झालेल्या बैठकीत ओडिशाचे नवे मुख्यमंत्री आणि दोन उपमुख्यमंत्र्यांच्या नावांची घोषणा केली. त्यानुसार मोहन माझी हे ओडिशाचे नवे मुख्यमंत्री असतील. कनकवर्धन सिंहदेव आणि प्रभाती परिदा हे राज्याचे उपमुख्यमंत्री असतील. मोहन मांझी हे आज (दि. 12) सायंकाळी 5 वाजता मुख्यमंत्रिपदाची शपथ घेतील.
मोहन माझी हे क्योंझरमधून 4 वेळा आमदार आहेत. 2024 च्या विधानसभेत त्यांनी बीजेडीच्या वीणा माझी यांचा 11 हजारांहून अधिक मतांनी पराभव केला. याशिवाय 2019, 2009 आणि 2000 मध्येही ते आमदार राहिले आहेत. कनकवर्धन सिंगदेव पटनागढचे आमदार आहेत आणि प्रभाती परिदा पुरीच्या निमापारा मतदारसंघातून आमदार आहेत.
कनक वर्धन सिंहदेव हे बोलंगीरच्या राजघराण्यातील आहेत. नवीन पटनायक यांच्या सरकारमध्ये ते 2000 ते 2004 पर्यंत उद्योग आणि सार्वजनिक उपक्रम आणि 2004 ते 2009 पर्यंत शहरी विकास आणि सार्वजनिक उपक्रमांचे कॅबिनेट मंत्री राहिले आहेत. याशिवाय ते पक्षाचे प्रदेशाध्यक्षही राहिले आहेत.
ओडिशा विधानसभा निवडणुकीत भाजपने पहिल्यांदाच बहुमताने विजय मिळवला. राज्यातील 147 जागांपैकी भाजपला 78 जागा मिळाल्या. त्याचवेळी नवीन पटनायक यांच्या बिजू जनता दलाने (बीजेडी) 51, काँग्रेस 14, सीपीआयएम 1 आणि इतरांना 3 जागा जिंकल्या आहेत.
ओडिशातील नव्या मुख्यमंत्र्यांच्या शपथविधी सोहळ्याला पंतप्रधान नरेंद्र मोदीही उपस्थित राहणार आहेत. 12 जून रोजी दुपारी 2.30 वाजता ते भुवनेश्वरला पोहोचतील. यानंतर ते जनता मैदानावर जातील. पक्षाने शपथविधी सोहळ्यापूर्वी मोदींसाठी रोड शोचा प्रस्ताव ठेवला असला तरी पोलिसांकडून दुजोरा मिळणे बाकी आहे. या सोहळ्याला काही केंद्रीय मंत्री आणि भाजपशासित राज्यांच्या मुख्यमंत्र्यांसह अनेक पाहुणे उपस्थित राहणार आहेत. या कार्यक्रमाला आमदार आणि खासदारांसह सुमारे 50,000 लोक उपस्थित राहण्याची शक्यता आहे.
