चंद्राबाबू नायडू हे आज (दि. 12 जून) आंध्रप्रदेशच्या मुख्यमंत्रिपदाची शपथ घेणार आहेत. आज सकाळी 11 वाजता त्यांचा शपथविधी होईल. चंद्राबाबू नायडूंच्या मंत्रिमंडळात एकूण 25 मंत्री असतील. त्यामध्ये टीडीपीचे 19, जनसेनेचे 4 आणि भाजपचे 2 मंत्री असणार आहेत. या शपथविधी सोहळ्याला पंतप्रधान नरेंद्र मोदी हे हजर राहणार आहेत.
चंद्राबाबू नायडू यांनी विजयवाडा येथील ए कन्व्हेन्शन सेंटरमध्ये एनडीएच्या सर्व 164 आमदारांसोबत बैठक घेतली. त्यात टीडीपीचे अध्यक्ष चंद्राबाबू नायडू यांची एनडीए विधिमंडळ पक्षाच्या नेतेपदी एकमताने निवड करण्यात आली. अभिनेते-राजकारणी जनसेना प्रमुख पवन कल्याण यांची विधानसभेत सभागृह नेतेपदी निवड करण्यात आली. यानंतर नायडू आणि पवन कल्याण हे राज्यपाल एस. अब्दुल नजीर यांची भेट घेण्यासाठी राजभवनात पोहोचले. त्यांनी राज्यपालांची भेट घेऊन सरकार स्थापनेचा दावा केला.
आंध्र प्रदेशम विधानसभा निवडणुकीचा निकाल 4 जूनला जाहीर झाला. विधानसभेत एनडीएने प्रचंड बहुमताने विजय मिळवले. राज्यातील 175 विधानसभेच्या जागांपैकी नायडूंच्या टीडीपीला 135 जागा, पवन कल्याण यांच्या जनसेनेला 21 आणि भाजपला 8 जागा मिळाल्या.
