इस्रायलने रविवारी गाझा शहरामध्ये केलेल्या हवाई हल्ल्यामध्ये 90 हून अधिक पॅलेस्टिनी नागरिकांचा मृत्यू झाला. मृतांमध्ये एकाच कुटुंबातील 76 जणांचा समावेश आहे. सामान्य नागरिकांवर हल्ले न करण्याचा इशारा संयुक्त राष्ट्रांनी दिल्यानंतरच्या दुसऱ्याच दिवशी हा हल्ला झाला आहे. इस्रायलने रविवारी गाझामधील काही भागावर हवाई हल्ले केले. या हल्ल्यात 90 हून अधिक जणांचा मृत्यू झाला. हल्ल्यात दोन घरे पूर्णपणे उद्ध्वस्त झाली. त्यापैकी एका घरात एकाच कुटुंबातील 76 जण राहात होते. या सर्वांचा मृत्यू झाला. या कुटुंबातील एक जण संयुक्त राष्ट्रांच्या विकास कार्यक्रमात कर्मचारी होता. याशिवाय, जमिनीवरून कारवाई करताना इस्रायलच्या सैनिकांनी गाझामध्ये शंभरहून अधिक दहशतवाद्यांना अटक केली. या सर्वांना चौकशीसाठी इस्रायलमध्ये पाठविण्यात आले आहे. इस्त्रायलवर हमासने केलेल्या हल्ल्यानंतर इस्त्रायकडून सातत्याने हल्ले केले जात आहेत.
