>> शॅक ओनर्स असोसिएशनच्या जॉन लोबो यांचा आरोप
पर्यटन खात्याचे अधिकारी लाच न देणाऱ्या गोव्यातील शॅकमालकांना त्रास देत असल्याचा आरोप ज्येष्ठ शॅक मालक आणि गोवा शॅक ओनर्स असोसिएशनचे पदाधिकारी जॉन लोबो यांनी काल केला. दरम्यान, जॉन लोबो यांनी केलेले आरोप अतिशय गंभीर स्वरूपाचे असून, त्यांनी त्यांच्या आरोपाच्या समर्थनार्थ तपशील सादर करावा, असे पर्यटनमंत्री रोहन खंवटे यांनी सांगितले.
‘सोपो’ नावाची एक नियुक्त जागा आहे, जिथे शॅक मालकांना लाच देण्यासाठी बोलावले जाते. पैसे न भरणाऱ्यांना किरकोळ तफावत दाखवून त्रास दिला जातो; मात्र गोमंतकीय नसलेल्या शॅक मालकांना विशेष वागणूक दिली जाते. याविषयी मुख्यमंत्री आणि पर्यटनमंत्र्यांकडे तक्रार करूनही कारवाई झाली नाही, असा आरोपही लोबो यांनी केला.
उच्च न्यायालयाच्या आदेशानुसार सील करण्यात आलेल्या सर्व शॅक्सच्या परवान्यांची वैधता 31 मेला संपुष्टात येत असल्याने या शॅक्सचे सील कधी काढली जातील हे कोणालाही माहीत नाही, असे लोबो म्हणाले. जर शॅक त्वरित पाडले नाहीत, तर आम्हाला दंड केला जाईल. तसेच दुसऱ्याला पावसात इलेक्ट्रॉनिक उपकरणे खराब होण्याचा धोकाही आहे, असेही त्यांनी सांगितले.
चौकशीअंती दोषींवर कारवाई : खंवटे
या प्रकरणाची तातडीने पोलीस चौकशी करण्याची मागणी केली जाणार आहे. त्यात दोषी आढळल्यास कोणालाही सोडले जाणार नाही आणि दोषींवर कठोर कारवाई केली जाईल, असे पर्यटनमंत्री रोहन खंवटे यांनी स्पष्ट केले. पर्यटनाच्या बाबतीत राज्य सरकार गंभीर असून, या क्षेत्राचे नियमन करण्यासाठी जोरदार प्रयत्न करत आहे. हे आरोप राजकीय हेतूने किंवा पक्षपाती असतील, तर त्यांनाही कारवाईला सामोरे जावे लागेल, असा इशाराही त्यांनी दिला.
