>> भारतीय लष्कराचा ट्रक दरीत कोसळला
उत्तर सिक्कीममधील झेमा येथे लष्कराच्या ट्रकला झालेल्या अपघातात लष्करातील १६ जवानांना प्राण गमवावे लागले असून, चार जवान जखमी झाले आहेत. वळण घेत असताना वाहन उतारावरून घसरल्याने काल हा अपघात घडला. गंभीर जखमी झालेल्या जवानांना जवळच्या रुग्णालयात दाखल करण्यात आले आहे.
काल सकाळी लष्कराच्या तीन गाड्या जवानांना घेऊन जात होत्या. हा ताफा चाटणहून थांगूच्या दिशेने निघाला होता. उत्तर सिक्कीम हा अतिशय धोकादायक भाग आहे. हा भाग सध्या पूर्णपणे बर्फाने झाकलेला आहे. झेमा येथे जात असताना वळणावर तीव्र उतार असल्याने चालकाचे वाहनावरील नियंत्रण अचानक सुटले आणि एक वाहन खाली दरीत कोसळले. या अपघाताची माहिती मिळताच स्थानिक पोलीस अधिकारी घटनास्थळी पोहोचले आणि बचावकार्य सुरू केले.
४ जखमी जवानांना हेलिकॉप्टरच्या साहाय्याने दरीतून बाहेर काढण्यात यश आले. या दुर्घटनेत तीन कनिष्ठ अधिकारी आणि १३ सैनिकांसह एकूण १६ जवानांचा मृत्यू झाला. या दु:खाच्या प्रसंगी भारतीय लष्कर शोकाकूल कुटुंबीयांच्या पाठीशी उभे आहे, असे लष्कराने म्हटले आहे.
