गोव्यातील एक जुना उद्योगसमूह असलेल्या चौगुले उद्योगसमूहाचे अंतर्गत विभाजन व पुनर्रचना करण्यात आली आहे. खाण आणि उद्योग हे दोन्ही समूह यापुढे स्वतंत्रपणे कार्यरत राहतील. यापैकी चौगुले इंडस्ट्रीज ग्रुपची मालकी विजय चौगुले व रमेश चौगुले यांच्याकडे राहील. समूहातील इतर कुटुंबीयांचा सहभाग व सहकार्याने त्याचे कामकाज पाहिले जाईल. विजय चौगुले व रमेश चौगुले यांच्या नेतृत्वाखालील कौटुंबिक समूहाने त्यांच्या कंपन्यांचा ताबा घेतला असून तूर्त चौगुले इंडस्ट्रीज ग्रुप या नावाने त्या कार्यरत राहतील.
समूहातील कोणत्याही कंपनीच्या व्यवस्थापनात सध्या तरी कोणताही बदल करण्यात आलेला नाही. सर्व कर्मचार्‍यांचे हित सांभाळले जाईल अशी ग्वाही विजय चौगुले यांनी दिली आहे. चौगुले इंडस्ट्रीज समूहातील कंपन्या सध्याचे प्रमुख कार्यकारी अधिकारी व सरव्यवस्थापक यांच्या नेतृत्वाखालीच कार्यरत राहतील. गेली पन्नास वर्षे चौगुले कंपनीची वित्तीय व कायदेशीर बाजू हाताळणार्‍या प्रदीप महात्मे व प्रीती महात्मे यांच्याकडेच यापुढेही ते काम राहील असेही विजय चौगुले यांनी स्पष्ट केले आहे.
