कॉंग्रेसची जोरदार टीका
केंद्रातील मोदी सरकार हे ‘यू टर्न सरकार’ असल्याची टीका विरोधी कॉंग्रेसने काल केली. केंद्रात सत्तेवर आल्यापासून १८० दिवसात या सरकारने २५ वेळा घुमजाव केल्याचा दावा कॉंग्रेसचे प्रवक्ते अजय माकन यांनी केला.‘छे महिने पार, यू टर्न सरकार’ या शीर्षकाखालील एका पुस्तिकेचे प्रकाशन काल कॉंग्रेसने केले. ‘हे सरकार यू टर्न सरकार म्हणून ओळखले जाईल’ अशी प्रतिक्रिया ही ३० पानांची पुस्तिका प्रकाशित केल्यानंतर माकन यांनी व्यक्त केली.
निवडणूक प्रचारावेळी दिलेल्या प्रत्येक आश्वासनापासून मोदी सरकारने फारकत घेतल्याचा दावा त्यांनी केला. निव्वळ सत्तेवर येण्याच्या हेतूनेच भाजपने लोकांना मूर्ख बनविल्याचे माकन म्हणाले. याद्वारे भाजपने देशवासियांची दिशाभूल केल्याचे त्यांनी सांगितले. १०० दिवसात विदेशी बँकांमध्ये भारतीयांनी दडविलेला काळा पैसा भारतात आणू या आश्वासनाची पूर्तता भाजप सरकार करू शकले नसल्याबद्दलही त्यांनी टीका केली.
