आर्थिक गुंतवणूक फसवणूक प्रकरणात फरारी संशयित आरोपी मायरॉन रॉड्रिगीस आणि त्याची पत्नी दीपाली परब यांच्याविरुद्ध गोवा पोलिसांच्या आर्थिक गुन्हा अन्वेषण विभागाने मडगाव येथील दक्षिण गोवा प्रधान जिल्हा व सत्र न्यायालयात काल आरोपपत्र दाखल केले.
आर्थिक गुंतवणुकीसाठी उच्च परतावा देण्याच्या बहाण्याने 41 लाख रुपयांची फसवणूक केल्याप्रकरणी नावेली येथील इव्हॉन आल्मेडा यांनी मायरॉन आणि दीपालीविरोधात दाखल केलेल्या तक्रारीनुसार हे आरोपपत्र दाखल करण्यात आले आहे.
या प्रकरणातील फरार मायरॉन रॉड्रिगीस विरोधात ब्लू नोटीस जारी करण्यात आली आहे. त्याच्या विरोधात रेड कॉर्नर नोटीस जारी करण्यासाठी पहिले आरोपपत्र दाखल करण्यात आले आहे.
आर्थिक गुंतवणूक फसवणूक प्रकरणात संशयित मायरॉन रॉड्रिगीस आणि इतरांच्या विरोधात दोन फसवणुकीचे गुन्हे दाखल केले आहेत. त्यातील पहिल्या प्रकरणामध्ये काल आर्थिक गुन्हा विभागाने आरोपपत्र दाखल केले. संशयित मायरॉन आणि त्याची पत्नी दीपाली परब हे दोघेही फरार आहेत. दीपाली परबच्या विरोधात नोटीस जारी करण्यात आलेली आहे.
संशयित मायरॉनच्याविरोधात आणखी एका आर्थिक गुंतवणूक फसवणूक प्रकरणाची गोवा पोलिसांच्या गुन्हा अन्वेषण विभागाकडून चौकशी केली जात आहे. त्याने सुमारे 130 कोटी रुपयांची फसवणूक केल्याचा आरोप आहे. गुन्हा अन्वेषण विभागाने त्याची पहिली पत्नी सुनिता रॉड्रिगीस हिला अटक करून तपास सुरू केला आहे. सध्या तिची न्यायालयीन कोठडीत रवानगी करण्यात आलेली आहे.
