>> माहिती-तंत्रज्ञान मंत्री रोहन खंवटे यांची माहिती
राज्य सरकारच्या ऑनलाइन पद्धतीने सध्या सुरू असलेल्या 241 सरकारी सेवा व्हॉट्सॲपवर लवकरच उपलब्ध करण्यात येणार आहेत. तसेच, विद्यार्थ्यांच्या प्रकल्पांना निधी देण्यासाठी स्टार्टअप धोरणात दुरुस्ती केली जाणार आहे, अशी घोषणा माहिती-तंत्रज्ञान मंत्री रोहन खंवटे यांनी गुगल फॉर डेव्हलपर्सच्या बिल्ड विथ एआय परिषदेत बोलताना येथे काल केली.
राज्य सरकारकडून स्टार्टअप आणि आयटी धोरण राबविण्यात येत आहे. राज्यात 543 नोंदणीकृत स्टार्टअप आहेत. राज्यात स्टार्टअपसाठी आवश्यक निधी आणि साधन सुविधा उपलब्ध करून देण्याचे काम केले जात आहे. आजच्या काळात एआयला चालना मिळत असून त्याचा फायदा सरकार आणि नागरिकांना होणार आहे, असे मंत्री खंवटे यांनी सांगितले.
केंद्रीय वाणिज्य आणि उद्योगमंत्री पियुष गोयल यांनी जाहीर केलेल्या दोन ग्लोबल कॅपॅबिलिटी सेंटर्स (जीसीसी) पैकी एक सेंटरसाठी गोवा सरकार प्रयत्न करीत आहे. या केंद्रामुळे मोठ्या कंपन्यांना आकर्षित होऊ शकतात आणि एकूण आयटी क्षेत्राला चालना मिळू शकते. केंद्र सरकारने जीसीसीना प्रोत्साहन देण्यासाठी राज्यांना मार्गदर्शन करण्यासाठी राष्ट्रीय चौकट तयार करण्याची घोषणा देखील केली आहे. योगायोगाने, जीसीसी ही बहुराष्ट्रीय कंपन्यांनी आयटी, वित्त, विश्लेषण आणि संशोधन आणि विकास यासारख्या कामकाज हाताळण्यासाठी स्थापन केलेली ऑफशोअर युनिट्स आहेत. आयटी आणि आयटीईएसमधील जवळजवळ 72 टक्के विद्यार्थी नोकरी करतात, असेही मंत्री खंवटे यांनी सांगितले.
राज्यातील महाविद्यालयीन विद्यार्थ्यांनी हाती घेतलेल्या प्रकल्पांना सरकारी निधीचा लाभ देण्यासाठी स्टार्टअप धोरणात सुधारणा करण्यात येणार आहे. महाविद्यालयांच्या शिफारशींनुसार प्रकल्पांची निवड केली जाईल. तुये येथे आयटी व्हिलेज उभारण्यात येणार आहे. त्यासाठी जागा निश्चित करण्यात आली आहे, असेही मंत्री खंवटे यांनी सांगितले.
