>> गोंधळ प्रकरणी भाजपच्या 18 आमदारांचे निलंबन
कर्नाटकमध्ये सध्या हनी ट्रॅपचा मुद्दा चांगलाच तापला आहे. सहकारमंत्री के. एन. राजन्ना यांनी विधानसभेत बोलताना केलेल्या एका दाव्यानंतर राजकारणात मोठी खळबळ उडाली आहे. एका केंद्रीय नेत्यासह 48 नेते हनी ट्रॅपमध्ये अडकल्याचा दावा मंत्री के. एन. राजन्ना यांनी केला. त्यांच्या या दाव्यानंतर काल कर्नाटकच्या विधानसभेत विरोधकांनी सत्ताधाऱ्यांना चांगलेच घेरले.
काल कर्नाटक सरकारने सरकारी कंत्राटांमध्ये मुस्लिमांना 4 टक्के आरक्षण देणारे विधेयक मंजूर केले. त्यामुळे हनी ट्रॅपचा मुद्दा आणि सरकारी कंत्राटांमध्ये मुस्लिमांना 4 टक्के आरक्षण देणारे विधेयकाच्या विरोधात भारतीय जनता पक्षाच्या आमदारांनी विधानसभेत मोठा गदारोळ केला. सरकारच्या विरोधात जोरदार घोषणाबाजी केली. एवढेच नाही तर काही आमदारांनी विधानसभा अध्यक्षांच्या खुर्चीवर काही कागदपत्रे भिरकावली. या अभूतपूर्व गोंधळानंतर मार्शलने भाजप आमदारांना उचलून सभागृहाबाहेर काढले. यानंतर सभागृहात गोंधळ घातल्याप्रकरणी भाजपच्या 18 आमदारांवर निलंबनाची कारवाई करण्यात आली.
या 18 आमदारांनी विधानसभेच्या कामकाजात अडथळा आणल्याचा आरोप करण्यात आला. तसेच विधानसभेच्या अध्यक्षांच्या आदेशाचे उल्लंघन केल्याचा ठपका ठेवत ही कारवाई करण्यात आली असल्याची माहिती देण्यात आली. यानंतर 18 आमदारांचे 6 महिन्यांसाठी निलंबन करण्यात आले. दरम्यान, हनी ट्रॅप प्रकरणाची उच्च न्यायालयाच्या न्यायमूर्तींमार्फत चौकशी करण्याची मागणी भाजपच्या आमदारांनी केली.
निलंबित आमदार कोण?
निलंबित करण्यात आलेल्या आमदारांमध्ये विरोधी पक्षाचे मुख्य सचेतक दोड्डानागौडा एच. पाटील, अश्वथ नारायण सी. एन., एस. आर. विश्वनाथ, बी. ए. बसवराज, एम. आर. पाटील, चन्नाबासप्पा (चन्नी), बी. सुरेश गौडा, उमानाथ ए. कोट्यान, शरणु सालगर, शैलेंद्र बेलदाले, सी. के. रामामूर्ती, यशपाल ए. सुवर्णा, बी. पी. हरीश, भरत शेट्टी वाय, मुनीरत्ना, बसवराज मट्टीमूद, धीरज मुनीराजू आणि चंद्रू लमाणी यांचा समावेश आहे.
