वास्को येथून कर्नाटकच्या दिशेने जिंदाल कंपनीचा माल घेऊन जाणाऱ्या मालवाहू रेल्वेचे 21 डबे शुक्रवारी सकाळी 9.30 वाजण्याच्या सुमारास दूधसागरजवळ सोनावळी येथे रुळावरून घसरले. त्यात एक डबा पूर्णपणे घसरून माल जमिनीवर कोसळला आहे. मालवाहू रेल्वेचे डबे घसरल्याने रेल्वे वाहतूक ठप्प झाली असून, अनेक रेल्वे इतर मार्गाने वळविण्यात आल्या आहेत. वास्को ते निजामुद्दीन आणि निजामुद्दीन ते वास्को या दोन गाड्या दुसऱ्या मार्गावरून वळवण्यात आल्या.
मिळालेल्या माहितीनुसार, शुक्रवारी अपघातग्रस्त झालेल्या मालगाडीत कोळसा भरला होता. कुडचडे रेल्वे स्थानकावरून कुळेमार्गे घाट मार्गादरम्यान अचानक डबे रूळावरून घसरले. त्यामुळे 10379 आणि 17310 या दोन गाड्या रद्द करण्यात आल्या, तर वास्को ते निजामुद्दीन आणि निजामुद्दीन ते वास्को या दोन गाड्या इतर मार्गाने वळवण्यात आल्या आहेत.
