>> इंग्लंडविरुद्धच्या एकदिवसीय मालिकेसाठी टीम इंडियाची घोषणा
भारतीय क्रिकेट नियामक मंडळाने इंग्लंडविरुद्धच्या तीन एकदिवसीय सामन्यांच्या मालिकेसाठी १८ सदस्यीय भारतीय संघाची काल शुक्रवारी घोषणा केली. २३, २६ व २८ मार्च रोजी पुणे येथे या मालिकेतील सामने होणार आहेत. सूर्यकुमार यादव, कृणाल पंड्या व प्रसिद्ध कृष्णा यांना या संघात स्थान मिळाले आहे.
मुंबईकर पृथ्वी शॉ व कर्नाटकचा सलामीवीर देवदत्त पडिकल यांच्याकडे विजय हजारे करंडक स्पर्धेतील दमदार कामगिरीनंतरही दुर्लक्ष करण्यात आले आहे. या युवा सलामीवीरांनी हजारे स्पर्धेत अनुक्रमे ८२७ व ७३७ धावा कुटल्या होत्या.
मागील वर्षी भारतीय संघ ऑस्ट्रेलिया दौर्‍यावर गेलेला त्यावेळी मयंक अगरवाल, जसप्रीत बुमराह, मोहम्मद शमी, मनीष पांडे, नवदीप सैनी व संजू सॅमसन हे वनडे संघाचा भाग होते. यातील एकही खेळाडू इंग्लंडविरुद्धच्या मालिकेचा भाग नाही. कसोटी मालिकेतील दमदार कामगिरीनंतरही रवींद्र जडेजाची जागा भरण्यासाठी अक्षर पटेलऐवजी कृणाल पंड्या याला वनडे संघात स्थान मिळाले आहे.
कर्नाटकचा २५ वर्षीय कृष्णा याने २०१५ साली प्रथमश्रेणी क्रिकेटमध्ये पदार्पण केले होते. यानंतर त्याच्या नावावर केवळ ९ सामन्यांची नोंद आहे. ४८ अ दर्जाच्या सामन्यांत मात्र त्याने २३.०७च्या सरासरीने ८१ व ४० टी-ट्वेंटी सामन्यांत ३५.८४च्या सरासरीने व ८.४९च्या इकॉनॉमीने ३३ बळी घेतले आहेत. २०१८ सालापासून तो केकेआर या आयपीएल फ्रेंचायझीचा भाग आहे. आयपीएलमध्ये २४ सामन्यांत १८ बळींची नोंद त्याच्या नावावर आहे.
संघात स्थान न देण्यात आलेल्या काही खेळाडूंमागे विविध कारणे आहेत. लग्नाच्या कारणास्तव बुमराह याला इंग्लंडविरुद्धच्या चौथ्या कसोटीसाठी तसेच संपूर्ण मर्यादित षटकांच्या सामन्यांसाठी सुटी देण्यात आली आहे. मागील वर्षी डिसेंबरमध्ये ऑस्ट्रेलियाविरुद्धच्या कसोटी मालिकेत मनगटाला झालेल्या दुखापतीनंतर शमी क्रिकेटपासून दूर आहे. टेनिस एल्बोमुळे मनीष पांडेला संपूर्ण सय्यद मुश्ताक अली टी-ट्वेंटी स्पर्धेला मुकावे लागले होते. विजय हजारे ५० षटकांच्या स्पर्धेतही त्याने केवळ दोन सामन्यांत कर्नाटकचे प्रतिनिधित्व केले होते. वेगवान गोलंदाज नवदीप सैनीला वगळण्यामागील कारण मात्र गुलदस्त्यात आहे.
भारतीय संघ ः विराट कोहली, रोहित शर्मा, शिखर धवन, शुभमन गिल, श्रेयस अय्यर, सूर्यकुमार यादव, हार्दिक पंड्या, ऋषभ पंत, लोकेश राहुल, युजवेंद्र चहल, कुलदीप यादव, कृणाल पंड्या, वॉशिंग्टन सुंदर, टी. नटराजन, भुवनेश्‍वर कुमार, मोहम्मद सिराज, प्रसिद्ध कृष्णा व शार्दुल ठाकूर.
