जम्मू-काश्मीरमधील किश्तवाडमध्ये सुरक्षा दल आणि दहशतवाद्यांमध्ये चकमक सुरू आहे. दचन भागात सुरक्षा दलांनी जैश-ए-मोहम्मदच्या दोन ते तीन दहशतवाद्यांना घेरले असल्याची माहिती आहे. सध्या या परिसरात शोधमोहीम सुरू आहे. सुरक्षा दलांना या भागात काही दहशतवादी लपल्याची माहिती मिळाली होती, त्यानंतर ही कारवाई केली जात आहे.
गुप्त माहितीच्या आधारे सुरक्षा दलांनी या परिसराला पूर्णपणे वेढा घातला आहे. लष्कर, सीआरपीएफ आणि जम्मू-काश्मीर पोलिस संयुक्तपणे ही कारवाई करत आहेत. काल रविवारी दुपारी ही चकमक सुरू झाली आहे.
याआधी शनिवारी काउंटर-इंटेलिजन्स काश्मीरच्या (सीआयके) युनिटने काश्मीरमधील 4 जिल्ह्यांतील 10 वेगवेगळ्या ठिकाणी शोधमोहीम राबवली होती. सीमेपलीकडून जैश-ए-मोहम्मद कमांडर अब्दुल्लाह गाजीद्वारे चालवल्या जाणाऱ्या स्लीपर सेल आणि भरती नेटवर्कचा पर्दाफाश करण्यासाठी ही शोधमोहीम सुरु करण्यात आली होती. पुलवामा, श्रीनगर आणि बडगाम या काही जिल्ह्यांमधील ठिकाणी ही कारवाई करण्यात आली होती.
