धारगळ येथे बहुचर्चित सनबर्न महोत्सवात पहिल्याच दिवशी शनिवारी दिल्ली येथील युवकाचा सनबर्न महोत्सवात सहभागी झाल्यानंतर मृत्यू झाल्याची माहिती पोलिसांनी दिली आहे. सनबर्न महोत्सवाला उपस्थित राहिलेल्या दिल्लीतील करण राजू कश्यप याचा मृत्यू झाला. या युवकाचा नेमका मृत्यू कशाने झाला ते अजून कारण स्पष्ट झाले नाही. शवचिकित्सा अहवाल आल्यानंतर कारण स्पष्ट होणार आहे परंतु त्याच्या मृत्यूबाबत प्रमाणाबाहेर ड्रग्जचे सेवन केल्याचा संशय व्यक्त केला जात आहे.
करण कश्यप हा युवक दिल्ली येथील असून शनिवारी तो ईडीएम फेस्टिव्हलमध्ये सहभागी झाला होता. म्युझिकच्या तालावर त्याने जोशात नृत्यही केले. परंतु नंतर तो बेशुद्ध झाला. त्यामुळे त्याला नंतर म्हापशातील एका खासगी इस्पितळात उपचारासाठी नेण्यात आले. परंतु त्याचा उपचारादरम्यान मृत्यू झाल्याची माहिती सूत्रांनी दिली. त्याचा मृतदेह शवचिकित्सा करण्यासाठी गोमेकॉत पाठवला आहे.
या घटनेमुळे धारगळ येथे पहिल्यांदाच आयोजित केलेल्या या सनबर्न महोत्सवाला गालबोट लागले आहे. काल रविवारी सनबर्न महोत्सवाला गोव्याच्या विविध भागांतून तसेच देशातील विविध राज्यांतून अनेक युवा युवतींनी या महोत्सवात आपला सहभाग दर्शवला. मोठ्या प्रमाणात या ठिकाणी गाड्यांची वर्दळ सुरू होती. काही प्रमाणात वाहतुकीला अडथळा निर्माण झाला. बगल रस्त्याने ही वाहतूक सनबर्न ठिकाणी वळविल्याने राष्ट्रीय महामार्ग मोकळा होता.
