>> भरधाव वेगामुळे कारवरील ताबा सुटला
>> दोन जखमींपैकी एकजण गंभीर
वास्को मांगोरहील राष्ट्रीय मार्गावरून दाबोळी विमानतळमार्गे जाताना शांतिनगर येथे एका कारवरील चालकाचा ताबा गेल्याने शनिवारी (दि. 3) रात्री झालेल्या अपघातात 19 वर्षीय संजोग संजय बोरकर यांचा मृत्यू झाला. तर वाहनचालक डेव्हिड क्रूज यांच्यावर इस्पितळात उपचार करून घरी पाठविण्यात आले. वाहनात बसलेला सहर्ष भोसले याला अपघातात गंभीर दुखापत झाल्याने त्यांना गोवा वैद्यकीय महाविद्यालयात (गोमेकॉ) अतिदक्षता विभागात उपचारांसाठी दाखल करण्यात आले आहे.
शनिवारी (दि. 3) रात्री 11.40 वाजता वास्को मांगोरहील येथील राष्ट्रीय मार्गावरून दाबोळी विमानतळमार्गे जात असलेल्या स्वीफ्ट कार (जीए 01 इ 6398) भरधाव वेगात जात असताना शांतिनगर वास्को येथे ताबा सुटल्याने अपघात झाला. ताबा सुटल्याने चार चाकी वाहन सखल भागात एका घरावर जाऊन आदळले. अपघात झाल्याचे दिसून येताच आजुबाजूच्या लोकांनी वाहनातील असलेल्या तिघांना प्रथम उपचारासाठी दाबोळी चिखली येथील उपजिल्हा इस्पितळात दाखल केले. अपघातातील तिघांचीही प्रकृती गंभीर असल्याने त्यांना अधिक उपचारासाठी गोमेकॉत पाठविण्यात आले.
गोमेकॉत उपचार सुरू असताना गंभीररीत्या जखमी झालेला संजोग बोरकर याचा मृत्यू झाला. तर गंभीर जखमी सहर्ष भोसले (24) याला अतिदक्षता विभागात उपचारांसाठी दाखल करण्यात आले. वाहन चालक डेव्हिड क्रूज (20) याच्यावर उपचार करून घरी पाठविण्यात आले. अपघातात मृत्यू झालेला वास्को नॉन मून येथील संजोग बोरकर याचा मृतदेह रविवारी सकाळी गोमेकॉत शवचिकित्सा केल्यानंतर नातेवाइकांच्या ताब्यात देण्यात आला. दुपारी वास्को खारीवाडा हिंदू स्मशानभूमीत अंतिम संस्कार करण्यात आले. अपघाताची माहिती मिळताच पोलिसांनी शनिवारी रात्री अपघातस्थळी जाऊन पंचनामा केला. अपघाताची पुढील चौकशी वास्को पोलीस स्थानकाचे हवालदार अनंत पवार करीत आहेत.
