>> काल दोघांचा मृत्यू, १०१ बाधित
राज्यातील कोरोनाबाधित सक्रिय रुग्णांची संख्या आता एक हजाराच्या खाली आली असून ती ९९९ एवढी झाली आहे. गेल्या चोवीस तासांत कोरोनामुळे दोघांच्या मृत्यूची नोंद झाली. त्यामुळे राज्यातील कोरोनाने मृत्यू झालेल्यांची एकूण संख्या ३१५२ झाली आहे. तसेच काल राज्यात १०१ नवे कोरोनाबाधित रुग्ण सापडले. काल राज्यातील ४४७० जणांची स्वॅब चाचणी करण्यात आली. कोरोनाचा संसर्ग झालेल्या राज्यातील एकूण रुग्णांची संख्या १,७१,३९६ एवढी झाली आहे. कोरोना रुग्ण बरे होण्याचे प्रमाण ९७.५८ टक्के आहे.
सध्या राज्यात सर्वाधिक सक्रिय रुग्ण मडगाव येथे असून त्यांची संख्या ८६ आहे. कासावली ६३, पणजी ७२, सांगे ५८ अशी रुग्णसंख्या असून इतर ठिकाणी ५० पेक्षा कमी रुग्ण आहेत.
आतापर्यंत इस्पितळात उपचार घेतलेल्यांची संख्या २८,६६७ एवढी असून गृहविलिनीकरणात राहिलेल्यांची संख्या १,१९,२५२ एवढी आहे. राज्यात आतापर्यंत १०,६८,१७३ एवढ्या लोकांची कोरोना संसर्गाची चाचणी करण्यात आलेली आहे.
चोवीस तासांत १२७ कोरोनामुक्त
गेल्या चोवीस तासांत राज्यात १२७ जण बरे झाले आहेत. तर इस्पितळांतून काल १० जणांना डिस्चार्ज देण्यात आला. सध्या राज्यातील कोरोनामुक्त झालेल्यांची एकूण संख्या १,६७,२४५ एवढी झाली आहे, अशी माहिती आरोग्य खात्याने प्रसिद्धीस दिलेल्या पत्रकात दिली आहे. तसेच काल नव्याने इस्पितळात ११ जणांना भरती करण्यात आले. काल कोरोनाची सौम्य लक्षणे आढळल्याने ९० जणांनी घरी विलगीकरणाचा निर्णय घेतला.
