>> सरकारच्या परवानगीने विद्यालयांना ऑफलाईन परीक्षेची मुभा
कोविड महामारीमुळे राज्यात लागू करण्यात आलेली संचारबंदी गोवा सरकारने पुन्हा एकदा वाढवली असून आता ती येत्या ३० ऑगस्ट रोजीसकाळी ७ वाजेपर्यंत लागू राहणार आहे.
मांडवी नदीतील तरंगणार्‍या कॅसिनोसह राज्यातील सर्व कॅसिनो, प्रेक्षकागृहे, समाजसभागृहे, जलक्रीडा, जलउद्याने, करमणूक उद्याने, स्पा, मसाज पार्लर्स ही बंदच राहतील. मात्र सरकारच्या परवानगीने विद्यालयांना ऑफलाईन पद्धतीने परीक्षा तसेच स्पर्धात्मक परीक्षा घेता येईल. तसेच एखाद्या स्थळावर त्याच्या क्षमतेच्या ५० टक्क्यांपेक्षा जास्त लोकांना एकत्र आणून सामाजीक, राजकीय मेळावे, क्रीडा मेळावे तसेच करमणुकीचे, सांस्कृतिक, शैक्षणिक कार्यक्रम, लग्न समारंभ, अन्य सोहळे आदी आयोजित करण्यास परवानगी नाही.
केरळ सोडून अन्य राज्यांतून येणार्‍यांना ७२ तासांपूर्वी केलेला कोविड चाचणीचा आरटी-पीसीआर चाचणीचा निगेटीव्ह अहवाल सादर केल्यास राज्यात प्रवेश देण्यात येणार आहे. मात्र आणीबाणीच्या वैद्यकीय उपचारासाठी परराज्यातून जर कुणाला गोव्यात यायचे असेल तर त्याला त्यासाठीचा पुरावा सादर करावा लागेल.
दोघे ड्रायव्हर व एका हेल्परला मालवाहू ट्रकातून राज्यात येता येईल. मात्र, त्यांना कोविडची लक्षणे नाहीत हे पाहण्यासाठी नाक्यावर थर्मल गनने तपासणी करून त्यांना आत येण्यास परवानगी असेल. तसेच १४ दिवसांपूर्वी कोविड लशीचे दोन्ही डोस घेतलेल्या व कोविडची कोणतीही लक्षणे नसलेल्यांना प्रवेश देण्यात येईल. त्यात येथील उद्योगात काम करणारे कामगार व मजूर तसेच उद्योगधंदा व नोकरीसाठी येणारे कोविडमुळे परराज्यात अडकून पडलेल्यांचा समावेश असेल.
