447 द्रोन व 67 क्षेपणास्त्रे डागली
इस्रायल आणि इराण यांच्यातील युद्ध अमेरिकेच्या मध्यस्थीने थांबले आहे. मात्र आता रशिया आणि युक्रेन यांच्यातील युद्ध पुन्हा एकदा पेटले आहे. रशियाने युक्रेनवर आतापर्यंतचा सर्वात मोठा एअर स्ट्राईक (हवाई हल्ला) केला आहे. या हल्ल्यात युक्रेनमधील शेकडो लोक मारले गेल्याची शक्यता व्यक्त करण्यात आली आहे.
रशियाने युक्रेनवर आतापर्यंतचा सर्वात मोठा हवाई हल्ला केला आहे. या हल्ल्यात रशियाने युक्रेनवर तब्बल 477 द्रोन आणि 67 क्षेपणास्त्रे डागली आहेत. एका रात्रीत रशियाने युक्रेनवर हा हल्ला चढवला आहे. या हल्ल्यानंतर आता रशिया आणि युक्रेन यांच्यातील तणाव चांगलाच वाढला आहे.
रशियाचा हा आतापर्यंतचा सर्वात मोठा हवाई हल्ला असल्याचे युक्रेनने सांगितले आहे. गेल्या काही दिवसांपासून या दोन्ही देशांत लवकरच शस्त्रसंधीच्या चर्चेला सुरुवात होण्याची शक्यता व्यक्त केली जात होती. विशेष म्हणजे रशियाचे राष्ट्राध्यक्ष व्लादीमीर पुतीन यांनीही आम्ही शांतता चर्चेसाठी नव्याने चर्चा करायला तयार असल्याचे म्हटेल होते. असे असतानाच आता रशियाने युक्रेनवर हा संहारक हवाई हल्ला केला आहे.
युक्रेनचे फायटर जेट पाडले
रशियाच्या या हल्ल्याला परतवून लावण्यासाठी युक्रेनने यावेळी प्रयत्न केला. युक्रेनला पाश्चिमात्त्य मित्रराष्ट्रांकडून मिळालेल्या एफ-16 विमानालाही यावेळी रशियाने पाडले. यात युक्रेनच्या पायलटचा मृत्यू झाला. रशियाने या हल्यात पश्चिम युक्रेनसह युक्रेनमधील इतर प्रदेशालाही लक्ष्य केले आहे. तर दुसरीकडे आपल्या हवाई क्षेत्राचे रक्षण करण्यासाठी पोलंड तसेच इतर राष्ट्रांनी आपापली लढाऊ विमाने तयार ठेवली आहेत.
