मंदिराची भिंत कोसळून 9 मुलांचा मृत्यू झाल्याची घटना मध्य प्रदेशातील सागर इथं घडलीय. शाहपूर गावात मुसळधार पावसामुळे भिंत कोसळली. श्रावणानिमित्त मंदिरात शिवलिंग निर्मितीचे काम सुरू होते. यावेळी अचानक घडलेल्या घटनेत 9 चिमुकल्यांचा दुर्दैवी मृत्यू झाला. दुर्घटनेनंतर घटनास्थळी बचावकार्य सुरू करण्यात आले. मुसळधार पावसामुळे शाहपूर गावातल्या एका मंदिराची भिंत कोसळली. या भिंतीच्या ढिगाऱ्याखाली अनेक मुले अडकली. यातील 9 जणांचा मृत्यू झाला तर दोन जखमी झाली आहेत. जखमींना उपचारासाठी रुग्णालयात दाखल करण्यात आले. सकाळी साडे आठ वाजण्याच्या सुमारास ही घटना घडली. या घटनेत काही मुले जखमी असून त्यांच्यावर उपचार केले जात आहेत. तर घटनास्थळावरील ढिगारा बाजूला करण्यात आला. काल रात्रीपासून मुसळधार पाऊस पडत होता. त्यामुळेच कमकुवत झालेली भिंत कोसळली असावी अशी शक्यता आहे. दुर्घटनेत मृत्यू झालेल्या 9 मुलांचे वय हे 10 ते 15 वर्षे आहे.
