गोव्याची महिला ग्रँडमास्टर भक्ती कुलकर्णी (२३११) हिने महिलांच्या ४४व्या राष्ट्रीय प्रीमियर बुद्धिबळ स्पर्धेच्या दहाव्या फेरीअंती ६.५ गुणांसह संयुक्तपणे आघाडी घेतली आहे. अखिल भारतीय बुद्धिबळ महासंघाने गुजरातमध्ये या स्पर्धेचे आयोजन केले आहे. दहाव्या फेरीत भक्तीने आंतरराष्ट्रीय मास्टर पद्मिनी राऊत हिला बरोबरीत रोखले. भक्तीसह महिला ग्रँडमास्टर मीनाक्षी सुभारामन, महिला ग्रँडमास्टर सौम्या स्वामिनाथन व आंतरराष्ट्रीय मास्टर पद्मिनी राऊत यांचेदेखील ६.५ गुण झाले आहेत. बुधवारी होणार्‍या ११व्या व अंतिम फेरीत भक्तीचा सामना समृध्दा घोष हिच्याशी होणार आहे. भक्तीने या स्पर्धेत आत्तापर्यंत श्रुष्टी पांडे, मेरी ऍन गोम्स, साक्षी चितळांगे व सौम्या स्वामिनाथ यांचा पराभव केला आहे. नंदिपी पी.व्ही., किरण मनीषा मोहंती, बाल कन्नमा, स्वाती घाटे व पद्मिनी राऊतविरुद्धचा डाव तिने बरोबरीत सोडविला आहे. स्पर्धेच्या दुसर्‍या फेरीत भक्तीला मीनाक्षी सुभारामनकडून पराजित व्हावे लागले होते.
