बहुजन समाज पक्षाच्या सर्वेसर्वा मायावती यांनी काल 10 रोजी लखनौमध्ये झालेल्या पक्षाच्या बैठकीत पक्षाच्या उत्तराधिकारीपदी आपला भाचा आकाश आनंद यांची निवड केली आहे.
या बैठकीसाठी मायावतींनी पक्षाच्या सर्व राष्ट्रीय पदाधिकाऱ्यांना आणि राज्यांच्या प्रमुख पदाधिकाऱ्यांना बोलावले होते. आकाश आनंद हे मायावतींचा लहान भाऊ आनंद कुमार यांचे पुत्र आहेत. अलीकडेच बसपने आकाश आनंद यांच्याकडे चार राज्यांची जबाबदारी सोपवली होती. गेल्या 6 वर्षांत आकाश यांची पक्षातील सक्रियता वाढत आहे.
सुरूवातीला मायावतींनी आकाशची त्यांच्यासोबत व्यासपीठावर ओळख करून दिली होती. मायावतींनी आकाश आनंद यांना पक्ष समन्वयकासारखे महत्त्वाचे पद दिले होते. आकाश यांनी इतर राज्यात संघटनेच्या बैठका घेतल्या होत्या.
