‘फ्युसेरियम ग्रॅमिनेअरम’च्या तस्करी प्रकरणी अमेरिकेत दोघा चीनी नागरिकांना अटक; एफबीआयकडून सतर्कतेचा इशारा
‘फ्युसेरियम ग्रॅमिनेअरम’ नावाच्या धोकादायक बुरशीची तस्करी केल्याप्रकरणी अमेरिकन पोलिसांनी दोन चीनी नागरिकांना अटक केली आहे. जिआन युनकिंग (33) आणि लियू झुनयोंग (34) अशी अटक करण्यात आलेल्या चीनी नागरिकांची नावे आहेत. ‘फ्युसेरियम ग्रॅमिनेअरम’ नावाच्या धोकादायक बुरशीचा वापर ‘कृषिदहशतवाद’ घडवून आणण्यासाठी संभाव्य जैविक शस्त्र म्हणून वर्गीकृत केले आहे. ही बुरशी गहू, बार्ली, मका आणि भात यांना लागण करणाऱ्या ‘हेड ब्लाइट’ या रोगाला कारणीभूत ठरते. फेडरल ब्युरो ऑफ इन्वेस्टिगेशन (एफबीआय)चे संचालक काश पटेल यांनी हा अमेरिकेच्या राष्ट्रीय सुरक्षेसाठी गंभीर धोका असल्याचा इशारा बुधवारी दिला.
काश पटेल यांनी दिलेल्या माहितीनुसार, दोन चीनी नागरिकांना मिशिगन विद्यापीठाच्या प्रयोगशाळेत अभ्यासासाठी एक धोकादायक बुरशी अमेरिकेत चोरीछुपे आणल्याच्या आरोपाखाली अटक करण्यात आली आहे. हे प्रकरण चीनच्या कम्युनिस्ट पक्षाने अमेरिकेच्या संस्था आणि अन्न सुरक्षेविषयक पायाभूत सुविधांमध्ये शिरकाव करण्याचा प्रयत्न असल्याचे निदर्शक आहे. आपल्या अन्नपुरवठा साखळीवर झालेला हल्ला आपल्या अर्थव्यवस्थेला हादरा देऊ शकतो आणि अमेरिकन नागरिकांच्या जीवितास धोका निर्माण करू शकतो, असे त्यांनी म्हटले आहे.
या प्रकरणी अमेरिकन पोलिसांनी दोन्ही आरोपींवर कटकारस्थान रचणे, तस्करी करणे, दिशाभूल करणे आणि बनावट व्हिसाद्वारे देशात प्रवेश करणे यांसारख्या गुन्ह्यांची नोंद केली आहे.
अटक केलेल्या आरोपींमध्ये एकजण चीनच्या कम्युनिस्ट पक्षाचा कट्टर समर्थक आहे. दोन्ही आरोपींचा उद्देश अमेरिकेच्या राष्ट्रीय सुरक्षितेला गंभीर धोका निर्माण करण्याचा होता. आरोपी जिआन आणि लियू हे दोघेही चीनमधून अमेरिकेत आले होते. डेट्रॉइट विमानतळावर उतरल्यानंतर अधिकाऱ्यांनी त्यांच्या बॅगेची तपासणी केली. त्यावेळी दोघांच्याही बॅगेत वनस्पतीजन्य संशयित वस्तू आढळून आल्या. यासंदर्भात अधिकाऱ्यांनी विचारणा केली असता आरोपींनी सुरुवातीला उडवाउडवीची उत्तरे दिली. मात्र, नंतर त्यांनी कबूल केले की या संशयित वस्तू ते मिशिगन विद्यापीठात संशोधनासाठी वापरणार होते. वैज्ञानिक संशोधनात या बुरशीला कृषिदहशतवादाचे संभाव्य शस्त्र म्हणून वर्गीकृत केले आहे.
कृषिदहशतवाद म्हणजे नेमके काय?
सोप्या भाषेत सांगायचे झाले, तर कृषिदहशतवाद म्हणजे शेती क्षेत्रात जाणूनबुजून रोग, कीटक किंवा इतर हानिकारक जैविक घटक सोडणे. पिकांचे मोठ्या प्रमाणावर नुकसान करून अन्नधान्यांची टंचाई निर्माण करणे हा यामागचा मुख्य हेतू असतो. कृषीवर आधारित असलेल्या देशाच्या अर्थव्यवस्थेला आणि सत्तेतील सरकारला अस्थिर करण्याचा प्रयत्न याद्वारे केला जातो. हा प्रकार सहज ओळखता न येणारा असल्यामुळे तो अत्यंत प्रभावी मानला जातो. विषारी अन्नधान्य खाल्ल्यामुळे नागरिकांच्या जीवालाही मोठा धोका निर्माण होऊ शकतो.
