>> श्रीनगरमधील घटना; १२ जखमी; दोघांची प्रकृती गंभीर
जम्मू-काश्मीरच्या श्रीनगरमध्ये दहशतवाद्यांनी पुन्हा एकदा सुरक्षा दलांना लक्ष्य केले. श्रीनगरच्या झेवान भागात सशस्त्र पोलिसांच्या ९व्या बटालियनवर भीषण दहशतवादी हल्ला झाला. या हल्ल्यात २ पोलीस शहीद झाले असून, १२ जण जखमी झाले आहेत. जखमींपैकी २ जणांची प्रकृती चिंताजनक आहे. सर्व जखमींना जवळच्या रुग्णालयात दाखल करण्यात आले आहे.
मिळालेल्या माहितीनुसार, बसमधून जात असताना दहशतवाद्यांनी पोलिसांवर हल्ला केला. दहशतवाद्यांनी पंथा चौक-खोनमोह रस्त्यावर भारतीय राखीव पोलिसांच्या ९व्या बटालियनच्या वाहनावर अंदाधुंद गोळीबार केला. या गोळीबारात २ पोलीस शहीद झाले, तर १२ जण जखमी झाले. सर्व जखमींना उपचारासाठी रुग्णालयात दाखल करण्यात आले आहे. या घटनेनंतर परिसराची नाकाबंदी करण्यात आली.
मिळालेल्या माहितीनुसार, ज्या बसमधून पोलीस जात होते, ती बस बुलेटप्रूफ नव्हती. शिवाय, बहुतांश पोलीस कर्मचार्‍यांकडे त्यांचा बचाव करण्यासाठी बंदुका आणि इतर साहित्य देखील नव्हते. फार कमी पोलिसांकडे शस्त्रे होती. तसेच, बस थांबवण्यासाठी दहशतवाद्यांनी आधी बसच्या टायरवर गोळीबार केला. त्यानंतर बसवर दोन्ही बाजूंनी जोरदार गोळीबार झाला.
