गेल्या चार दशकांपासून प्रेक्षकांचे मनोरंजन करणारे ज्येष्ठ अभिनेते आणि रंगकर्मी जयंत सावरकर (88) यांचे काल निधन झाले. त्यांच्यावर मुंबईतील रुग्णालयात उपचार सुरू होते. उपचारादरम्यान त्यांची प्राणज्योत मालवली. शंभराहून अधिक मराठी नाटकांमध्ये आणि 30 हून अधिक हिंदी चित्रपटांत त्यांनी अजरामर भूमिका साकारल्या आहेत.
जयंत सावरकर यांच्या निधनानंतर चाहत्यांसह मराठी मनोरंजन सृष्टीतील अभिनेते, अभिनेत्रींनी शोक व्यक्त केला आहे.
जयंत सावरकर हे 97 व्या अखिल भारतीय मराठी नाट्य संमेलनाचे अध्यक्ष होते. जयंत सावरकर यांनी रंगभूमीसह मालिका, चित्रपट तसेच वेबसीरिजमध्येही अभिनय केला आहे.
गेल्या 15 दिवसांपासून जयंत सावरकर यांच्यावर उपचार सुरू होते. उपचारादरम्यान त्यांची प्रकृती खालावली. त्यानंतर त्यांना व्हेटिंलेटरवर ठेवण्यात आले. पण नंतर काही वेळातच त्यांचे निधन झालं. जयंत सावरकर यांच्या पार्थिवावर आज 25 जुलै रोजी अंत्यसंस्कार होणार आहेत.
विसाव्या वर्षी अभिनय सुरू
जयंत सावरकर यांचा जन्म 3 मे 1936 रोजी गुहागर येथे झाला. वयाच्या विसाव्या वर्षी जयंत सावरकर यांनी अभिनय कारकिर्दीस सुरूवात केली. त्यांच्या गाजलेल्या अनेक नाटकांपैकी अपराध मीच केला, अपूर्णांक, अलीबाबा चाळीस चोर, अल्लादीन जादूचा दिवा, आम्ही जगतो बेफाम, एकच प्याला, संशयकल्लोळ अशा नाटकांचा समावेश आहे. एकच प्यालामधील त्यांची तळीरामाची भूमिका खूपच गाजली. ते विनोदी तसेच गंभीर भूमिकाही करायचे. काही महिन्यांपूर्वीच ‘आई कुठे काय करते’ या छोट्या पडद्यावरील मालिकेतही त्यांनी काम केले आहे. तसेच त्यांनी ‘समांतर’ या वेबसीरिजमध्येही काम केले आहे.
चित्रपटांतही काम
नाटकांबरोबरच जयंत सावरकर यांनी चित्रपटांमध्येदेखील काम केले आहे. येड्यांची जत्रा, बिस्कीट, विघ्नहर्ता महागणपती, हरिओम विठ्ठला, पोलीस लाईन या मराठी चित्रपटांसोबतच सिंघम, वास्तव : द रिलिटी, बडे दिलवाला, सिंघम या हिंदी चित्रपटांमध्येही त्यांनी अभिनय केला आहे.
