जम्मू-काश्मीरमधील कठुआ जिल्ह्यातील बिलवार तहसीलमधील कोग-मंडली येथे रविवारी दुसऱ्या दिवशीही सुरक्षा दल आणि दहशतवाद्यांमध्ये चकमक सुरू होती. या चकमकीत काल रविवारी दुपारी एक दहशतवादी मारला गेला आहे. त्याचा मृतदेह सापडला आहे. सुरक्षा दलांनी शनिवार, 28 सप्टेंबर रोजी शोध मोहीम सुरू केली होती. त्यांना तीन ते चार परदेशी दहशतवादी असल्याची माहिती मिळाली होती.
संध्याकाळी उशीरा दहशतवाद्यांनी सुरक्षा दलांवर गोळीबार केला, ज्यात हेड कॉन्स्टेबल बशीर अहमद शहीद झाले. डीएसपी आणि साहायक उपनिरीक्षक जखमी झाले. दोन्ही अधिकाऱ्यांची प्रकृती स्थिर आहे.
कुलगाममध्ये 2 ठार
शनिवारी 28 सप्टेंबर रोजी कुलगामच्या आदिगाम देवसर भागातही चकमक झाली होती. त्यात सुरक्षा दलांनी दोन दहशतवाद्यांचा खात्मा केला. पोलिसांनी दिलेल्या माहितीनुसार, पाकिस्तानच्या दहशतवाद्यांनी काही तरुणांच्या मदतीने आयईडी पेरण्यासाठी काही ठिकाणेही निवडली होती. या हँडलरने त्या तरुणांना आयईडी बनवण्यासाठी पैसेही दिले होते, जेणेकरून ते त्यासाठीचे साहित्य आणू शकतील. तरुणांना पिस्तूल आणि ग्रेनेडही देण्यात आले. तरुणांना टार्गेट किलिंग, सुरक्षा दलांवर ग्रेनेड फेकणे, आयईडी ब्लास्ट करणे यासारख्या कारवाया करण्याच्या सूचना देण्यात आल्या होत्या.
