कोची
इंडियन सुपर लीगमध्ये शनिवारी येथील जवाहरलाल नेहरू स्टेडियमवर केरला ब्लास्टर्सची लढत दिल्ली डायनामोज एफसीविरुद्ध होईल. मोसमाला उत्तम सुरवात झाली असल्यामुळे घरच्या मैदानावर खेळण्याचा फायदा उठविण्याचा ब्लास्टर्सचा प्रयत्न राहील.
ब्लास्टर्स दोन सामन्यांतून चार गुणांसह आघाडीच्या जथ्यात आहे. दोन वेळा अंतिम फेरी गाठलेल्या या संघाने सलामीला एटीकेविरुद्ध जोशात खेळ केला. कोलकात्यामध्ये त्यांनी प्रथमच विजय मिळविला. मुंबई सिटी एफसीविरुद्ध त्यांचा दुसरा विजय दृष्टिपक्षात आला होता, पण अखेरच्या क्षणी प्रांजल भुमीज याने गोल केल्यामुळे त्यांना एका गुणावर समाधान मानावे लागले.
भारताच्या १७ वर्षांखालील संघातील गोलरक्षक धीरज सिंग याने आतापर्यंत बचावाची ८५.७१ अशी सर्वोत्तम टक्केवारी प्रदर्शित केली आहे. तो खेळण्याची अपेक्षा आहे. संदेश झिंगन आणि नेमांजा लॅकिच-पेसिच यांनी बचाव फळीत भक्कम जोडी निर्माण केली आहे. यात महंमद रकीप आणि लालरुथ्थारा यांचाही समावेश आहे. झिंगन आणि कंपनीने आतापर्यंत एकच गोल पत्करला आहे. त्यामुळे दिल्लीसमोर ते खडतर आव्हान निर्माण करतील.
नवे प्रशिक्षक जोसेप गोम्बाऊ यांच्या मार्गदर्शनाखाली दिल्लीने पहिले दोन सामने घरच्या मैदानावर खेळले. यातून त्यांना एकच गुण मिळाला, पण दोन्ही सामने जिंकता आले असते असे दिल्लीला वाटत असेल. सलामीला पुणे सिटीविरुद्ध दिल्लीचा विजय नक्की वाटत होता, पण दिएगो कार्लोसने अंतिम टप्यात गोल केला. एटीकेविरुद्ध दिल्लीला १-२ असा पराभव पत्करावा लागला. यात स्वैर फिनीशिंग आणि अंतिम टप्यातील गोल कारणीभूत ठरला.
लालीयनझुला छांगटे आणि नंदकुमार शेखर यांनी दोन्ही बाजूंनी जोशात खेळ केला आहे, पण स्ट्रायकर अँड्रिया क्लाऊडेरोविच याला लवकर फॉर्म गवसेल अशी आशा गोम्बाऊ यांना असेल. दिल्लीच्या आघाडी फळीचे अचूकतेचे प्रमाण सर्वांत कमी २५ टक्के इतके आहे. ब्लास्टर्स घरच्या मैदानावर मोसमातील पहिल्या विजय मिळविण्याच्या निर्धाराने खेळेल. दुसरीकडे गोम्बाऊ यांच्या दिल्लीला एकूणच मोसमातील पहिल्या विजयाची प्रतिक्षा आहे. त्यामुळे रंगतदार ठरणारी ही लढत पाहण्यासाठी चाहत्यांना सज्ज व्हावे लागेल.
