कॅप्टन संजय डिकुन्हा यांनी काल समारंभपूर्वक वेरे येथील नौदल तळ असलेल्या आयएनएस मांडवीचे कमांडिंग ऑफिसर म्हणून सूत्रे स्वीकारली. मूळ कुडतरी-सासष्टी येथील कॅप्टन संजय हे १९९१ साली खडकवासला येथील राष्ट्रीय संरक्षण प्रबोधिनीतून शिक्षण घेऊन नौदलात दाखल झाले होते. त्यांचे वडील मेजर जन. इव्हान डिकुन्हा हे ४० वर्षांच्या लष्करातील सेवेनंतर निवृत्त झालेले आहेत. संप्रेषण तसेच इलेक्ट्रॉनिक युद्धनीतीत विशेषज्ञ असलेले डिकुन्हा यांनी आयएनएस कुथर, आयएनएस ब्रह्मपूत्रा, आयएनएस त्रिशूल, आयएनएस दिल्ली अशा भारतीय नौदलाच्या लढावू नौकांवर महत्त्वाच्या पदांवर काम केले आहे. ते विवाहित असून त्यांना दोन मुले आहेत.
