काणकोणातील अपघातात युवकाचा जागीच मृत्यू

भगतवाडा काणकोण येथील राष्ट्रीय महामार्गानजीक एका मालवाहू वाहनाने ठोकरल्यामुळे जांभळीमळ येथील जॉन फर्नाडिस (37) या युवकाचा जागीच मृत्यू झाला.
हा अपघात काल गुरूवारी पहाटे दीड वाजण्याच्या दरम्यान घडला असून या अपघातात बळी पडलेला युवक चार दिवसांपूर्वी परदेशातून आला होता. अपघातात बळी पडलेल्या युवक जॉन याचा मृतदेह काणकोण पोलिसांनी पंचनाम्यानंतर ताब्यात घेऊन शवचिकित्सेसाठी पाठविला आहे. या अपघाताला कारणीभूत झालेले वाहन पोलिसांनी ताब्यात घेतले आहे. दरम्यान, भल्या पहाटे हा अपघात झालेला असून एवढ्या पहाटे हा युवक त्या ठिकाणी का गेला होता आणि अपघात कसा घडला याप्रकरणी काणकोणचे पोलीस निरीक्षक हरिष देसाई पुढील तपास करीत आहेत.