देशातील एकूण रुग्णसंख्या 11 वर
ह्युमन मेटाप्युमोव्हायरस (एचएमपीव्ही) सारख्या कोरोना विषाणूचे काल गुरूवारी आणखी 2 रुग्ण आढळून आले आहेत. पहिले प्रकरण उत्तर प्रदेशातील आहे. लखनऊमध्ये एक 60 वर्षीय महिला पॉझिटिव्ह आढळली आहे. त्यामुळे देशात आतापर्यंत या संबंधीची रुग्णसंख्या 11 झाली आहे. महाराष्ट्रात 3, गुजरात, कर्नाटक आणि तामिळनाडूमध्ये प्रत्येकी 2, पश्चिम बंगाल आणि उत्तर प्रदेशात प्रत्येकी एक प्रकरणे नोंदवली गेली आहेत.
राज्यांत दक्षता
एचएमपीव्ही प्रकरण उघडकीस आल्यानंतर राज्यांनीही दक्षता वाढवली आहे. पंजाबमध्ये वृद्ध आणि लहान मुलांना मास्क घालण्याचा सल्ला देण्यात आला आहे. गुजरातमध्ये हॉस्पिटलमध्ये आयसोलेशन वॉर्ड बनवले जात आहेत. हरियाणामध्येही आरोग्य विभागाला लक्ष ठेवण्याचे आदेश देण्यात आले आहेत.
लहान मुले प्रभावित
एचएमपीव्हीची लागण झाल्यावर, रुग्ण सर्दी आणि कोविड-19 सारखी लक्षणे दाखवतात. त्याचा सर्वाधिक परिणाम लहान मुलांवर होतो. यापैकी 2 वर्षांखालील मुलांना सर्वाधिक त्रास होतो. केंद्राने राज्यांना इन्फ्लूएंझासारख्या आजार आणि गंभीर तीव्र श्वसन समस्या यांसारख्या श्वसन आजारांवर देखरेख वाढवण्याचा आणि जागरूकता पसरवण्याचा सल्ला दिला आहे.
भारत देश सज्ज
चीनमध्ये एचएमपीव्हीच्या वाढत्या प्रकरणांमध्ये आपत्कालीन परिस्थिती निर्माण झाल्याची चर्चा होती. मात्र, भारत सरकारने 4 जानेवारीला जॉइंट मॉनिटरिंग ग्रुपची बैठक घेतली होती. यानंतर सरकारने म्हटले होते की, थंडीच्या मोसमात फ्लूसारखी परिस्थिती असामान्य नाही. आम्ही चीनच्या घडामोडींवरही लक्ष ठेवून आहोत आणि त्यांना सामोरे जाण्यासाठी सरकार तयार आहे. खबरदारी म्हणून आयसीएमआर, एचएमपीव्ही चाचण्या करणाऱ्या लॅबची संख्या सरकार वाढवेल असेही सांगण्यात आले. वर्षभर एचएमपीव्ही प्रकरणांवरही लक्ष ठेवणार असल्याचे सरकारकडून स्पष्ट करण्यात आले आहे.
