>> सुदिन ढवळीकर यांची माहिती
गोवा विधानसभेचे सभापती राजेश पाटणेकर यांनी मगोपच्या आमदार अपात्रतेसंबंधीच्या दोन याचिकांवरील स्पष्टीकरणासाठी मगोपचे आमदार सुदिन ढवळीकर यांना काल बोलावले होते. सभापतींसमोरील दोन अपात्रता याचिकांपैकी एक अपात्रता याचिका मागे घेण्यात आली आहे, अशी माहिती आमदार ढवळीकर यांनी पत्रकारांशी बोलताना दिली.
सभापतींनी मगोपचे आमदार ढवळीकर यांना काल बुधवारी (दि. १०) आपल्या कार्यालयात हजर राहण्याची सूचना केल्याने आमदार अपात्रता याचिकांवर निवाडा जाहीर केला जाण्याची चर्चा सुरू झाली होती. तथापि, आमदार ढवळीकर यांनी सभापतींसमोर उपस्थित राहिल्यानंतर पत्रकारांशी बोलताना दिलेल्या माहितीत आमदार अपात्रता याचिकांवर निवाडा झाला नसल्याचे स्पष्ट झाले.
मगोपतून फुटून भाजपमध्ये प्रवेश केलेल्या उपमुख्यमंत्री मनोहर आजगांवकर आणि बांधकाममंत्री दीपक पाऊसकर यांच्याविरोधात मगोपचे ज्येष्ठ आमदार ढवळीकर यांनी सभापतींसमोर दोन अपात्रता याचिका दाखल केल्या होत्या. मगोपच्या आमदार अपात्रता याचिकांवरील सुनावणी पूर्ण झाली असून निवाडा राखून ठेवण्यात आला आहे. सभापतींनी मगोपच्या ३ मे २०१९ आणि १० मे २०१९ अशा दोन्ही याचिकांबाबत स्पष्टीकरण करण्याची सूचना केली. मगोपकडून दोनपैकी कुठल्या याचिकेवर भर दिला जातो असा प्रश्‍न सभापतींनी विचारला. त्यावेळी प्रथम दाखल केलेली ३ मेची याचिका मागे घेण्यात येत असल्याचे असे स्पष्ट करण्यात आले. सभापतींकडून आमदार अपात्रता प्रकरणी योग्य निर्णय घेतला जाईल, असा आशावाद आमदार ढवळीकर यांनी व्यक्त केला.
सर्वोच्च न्यायालयात आमदार अपात्रता प्रकरणी ८ मार्चला सुनावणी होणार होती. परंतु, त्या दिवशी सुनावणी झाली नाही. नवीन सुनावणीबाबत अजून माहिती प्राप्त झालेली नाही, अशी माहिती आमदार ढवळीकर यांचे वकील धवल झवेरी यांनी दिली.
